“Kimlargadir shikoyat qilib, meni tinchitishni so‘rab yurishibdi” — Botir Qodirov o‘ziga nisbatan bo‘layotgan bosimlar haqida

Xonanda Botir Qodirovning aytishicha, Jo‘rayevlar bilan sud ishi boshlanganidan keyin unga nisbatan tashqi bosimlar kuchaygan.

“Orqamdan turli ishlarni qilib yurishibdi. Ustimdan kimlargadir shikoyat qilib, ‘Botirni to‘xtatib beringlar, tinchitib beringlar’, deb aytishyapti. Ular meni chaqirganida borib, qo‘limdagi hujjatlarni, DNK natijalarini ko‘rsatgandim. O‘rtaga tushgan kishilar ham haqiqat qayerda ekanligini tushunib, ‘Sizlar aka-uka ekansizlar, yarashib olishinglar kerak’, deyishdi. ‘Dadam tan olmagan, biz ham tan olmaymiz’, deb dadasiga aybni to‘nkab, bahona qilishyapti”, — dedi Botir Qodirov.

Sherali Jo‘rayevning birinchi turmush o‘rtog‘i Xursanoy ayaning ma’lum qilishicha, u Shohjahon Jo‘rayev bilan suhbatda Botir Qodirov bilan yarashib olishni aytgan, lekin ikki tomon ham bu mojaroda bir-birini ayblagan.

Sudyalar oliy kengashi Botir Qodirov va Jo‘rayevlar o‘rtasidagi sud ishi yuzasidan bergan bayonotida ish bo‘yicha taraflarni turli shakl va ko‘rinishda bayonot berishdan tiyilishga, jurnalist va blogerlarni esa shaxsga oid ma’lumotlar hamda sud ishiga doir axborotlarni tarqatishdek nozik va hassos masalaga mas’uliyat bilan yondashishga chaqirgan.

Eslatib o‘tamiz, xonanda Qodirov Botir Sheraliyevich javobgarlar — Shohjahon va Zohirshoh Jo‘rayevlardan otalikni belgilash talabi bilan chiqqan sud ishi davom etmoqda.

Holat yuzasidan izoh bergan Zohirshoh Jo‘rayev jamoatchilikdan bunday piar va hayplarga oilasini aralashtirmaslikni iltimos qilgan.

Keyinroq Botir Qodirov Sherali Jo‘rayevning nikohli farzandi ekanligi hamda marhum hofizning o‘g‘illari bilan nima maqsadda sudlashayotgani haqida gapirgan edi.

Sherali Jo‘rayevning birinchi turmush o‘rtog‘i Xursanoy aya Botir Qodirov haqiqatan ham Sherali Jo‘rayevning o‘g‘li ekanligini ta’kidlagan.