Inson tanasidagi suv miqdori 45-75 foizni tashkil etadi, shuning sabab yetarli miqdorda suv ichish organizm uchun muhimdir, ammo ko‘pchilik tanadagi suv balansini muvozanatda ushlamaydi. Toza suv tanadagi suyuqlik yetishmasligini to‘ldiradi, kasallikni yengishda yordam beradi. Qahva, gazli suv, shakarli sharbat kabi ba’zi shirin ichimliklar esa, aksincha, zararli bo‘lishi mumkin.
Qo‘shimchalarsiz gazli suvning foyda va zarari
Gazlangan va shirin qo‘shimchalarsiz suv chanqoqni yaxshi qondiradi, tetiklantiradi va oddiy suvga qaraganda mazaliroq. Gazli suv tarkibida karbonat angidrid mavjud bo‘lib, uning normadagi ko‘rsatkichi ichimliklarda farq qiladi. Davlat standartlariga ko‘ra 1 litr suvda gaz miqdori o‘n grammdan oshmasligi, ya’ni gaz miqdori suv hajmining bir foizini tashkil qilishi lozim.
Ba’zi tabiiy buloqlar tabiiy gazlangan mineral suvdan iborat, uning foydasi qadimdan e’tirof etilgan. Tabiiy gaz bilan to‘yinmagan mineral suvning foydali xususiyatlarini saqlab qolish uchun ishlab chiqaruvchilar unga gaz qo‘shadi, chunki karbonat angidrid eng xavfsiz konservantlardan biri hisoblanadi.
Mineral suvning bir qancha foydali xususiyatlari bor, jumladan, u me’da shirasi kam ishlab chiqilishini davolaydi, oshqozon va ichak devorlarini mustahkamlaydi. Shuningdek, mineral suvlardan tayyorlangan dorivor o‘tlar damlama ta’sirini oshiradi, chunki tabiiy karbonat angidrid suvni antibakterial preparatga aylantiradi va organizmni patogen bakteriyalardan himoya qiladi.
Suvga sun’iy ravishda qo‘shilgan karbonat angidrid zararli bo‘lishi mumkin. Birinchidan, gazli suv oshqozon va ichak kasalliklari bilan og‘riganlar uchun mumkin emas, chunki karbonat angidrid ichki organlar shilliq qavatini yallig‘laydi. Gazlangan suvni ko‘p iste’mol qilish gastritga ham olib kelishi mumkin. Ikkinchidan, karbonat angidrid tish emalini yemiradi. Faqat buning uchun gazlangan suvni har kuni ko‘p miqdorda ichish kerak.
Shakarli va turli qo‘shimchalari bor gazlangan suvning foyda va zarari
Shakar, shakar o‘rnini bosuvchi moddalar, konservantlar, xushbo‘ylantiruvchi kabilar qo‘shilgan gazlangan suvning hech qanday yaxshi jihati yo‘q.
Gazli ichimliklarni ba’zan, masalan bayramlarda ichib turish zarar emas, biroq hayotini usiz tasavvur eta olmaydigan shaxslar sog‘lig‘i jiddiy xavf ostida bo‘lishi mumkin. Chunki gazli shirin ichimliklar ortiqcha vaznga, qonda glyukoza miqdori ortishiga va natijada qand kasalligiga olib kelishi mumkin.
Gazlangan shirin suvdagi ortofosfor kislotasi juda zararli, u suyaklardagi kalsiyni kamaytirib yuboradi va tishlar emalini yemiradi. Ishlab chiqaruvchilar fosfor kislotasi o‘rniga limon yoki olma kislotalaridan foydalanishi mumkin, ammo ularning katta miqdori ham xatarli. Gazli ichimliklardagi turli rang beruvchilar, konservantlar va aromatizatorlar ham zararlidir.
Izoh (0)