“Кимларгадир шикоят қилиб, мени тинчитишни сўраб юришибди” — Ботир Қодиров ўзига нисбатан бўлаётган босимлар ҳақида

Хонанда Ботир Қодировнинг айтишича, Жўраевлар билан суд иши бошланганидан кейин унга нисбатан ташқи босимлар кучайган.

“Орқамдан турли ишларни қилиб юришибди. Устимдан кимларгадир шикоят қилиб, ъБотирни тўхтатиб беринглар, тинчитиб берингларъ, деб айтишяпти. Улар мени чақирганида бориб, қўлимдаги ҳужжатларни, ДНК натижаларини кўрсатгандим. Ўртага тушган кишилар ҳам ҳақиқат қаерда эканлигини тушуниб, ‘Сизлар ака-ука экансизлар, ярашиб олишинглар керак’, дейишди. ‘Дадам тан олмаган, биз ҳам тан олмаймиз’, деб дадасига айбни тўнкаб, баҳона қилишяпти”, — деди Ботир Қодиров.

Шерали Жўраевнинг биринчи турмуш ўртоғи Хурсаной аянинг маълум қилишича, у Шоҳжаҳон Жўраев билан суҳбатда Ботир Қодиров билан ярашиб олишни айтган, лекин икки томон ҳам бу можарода бир-бирини айблаган.

Судьялар олий кенгаши Ботир Қодиров ва Жўраевлар ўртасидаги суд иши юзасидан берган баёнотида иш бўйича тарафларни турли шакл ва кўринишда баёнот беришдан тийилишга, журналист ва блогерларни эса шахсга оид маълумотлар ҳамда суд ишига доир ахборотларни тарқатишдек нозик ва ҳассос масалага масъулият билан ёндашишга чақирган.

Эслатиб ўтамиз, хонанда Қодиров Ботир Шералиевич жавобгарлар — Шоҳжаҳон ва Зоҳиршоҳ Жўраевлардан оталикни белгилаш талаби билан чиққан суд иши давом этмоқда.

Ҳолат юзасидан изоҳ берган Зоҳиршоҳ Жўраев жамоатчиликдан бундай пиар ва ҳайпларга оиласини аралаштирмасликни илтимос қилган.

Кейинроқ Ботир Қодиров Шерали Жўраевнинг никоҳли фарзанди эканлиги ҳамда марҳум ҳофизнинг ўғиллари билан нима мақсадда судлашаётгани ҳақида гапирган эди.

Шерали Жўраевнинг биринчи турмуш ўртоғи Хурсаной ая Ботир Қодиров ҳақиқатан ҳам Шерали Жўраевнинг ўғли эканлигини таъкидлаган.