Yevropa Ittifoqi Afg‘oniston uchun qariyb 32 mln yevro mablag‘ ajratadi

Yevropa Ittifoqining Osiyo departamenti rahbari, “Tolibon” hukumatining vakili bilan o‘tkazilgan uchrashuvda, atrof-muhitni muhofaza qilish uchun 20 million yevro, afg‘on tadbirkorlari va ishbilarmon ayollar uchun kichik kreditlar taqdim etish maqsadida 11,8 million yevro ajratilganini e’lon qildi.

Mazkur uchrashuvda “Tolibon”ning iqtisodiyot vazirligi rahbariyati Yevropa Ittifoqi vakillari bilan Afg‘onistonning iqtisodiy va ijtimoiy rivojlanishi yuzasidan muzokaralar olib bordi.

Yevropa Ittifoqining Afg‘onistondagi faoliyatida atrof-muhitni saqlash bo‘yicha rejalashtirilgan loyihalar ham ilgari suriladi. Bu loyihalar doirasida afg‘on xalqi, ayniqsa, ishbilarmon ayollar va tadbirkorlar uchun yangi imkoniyatlar yaratilishi kutilmoqda.

Mazkur muzokara jarayonida, “Tolibon” vakili Yevropa Ittifoqining Afg‘onistonga yo‘naltirgan yordami va xususiy sektorning ishtirokini olqishlab, ularning afg‘on oilalarining iqtisodiy farovonligini yaxshilashdagi rolini ta’kidlagan.

“Tolibon” vakili loyihalarni Afg‘onistonning iqtisodiy ustuvorliklariga moslashtirish borasida Yevropa Ittifoqini hamkorlik qilishga chaqirdi.