“Tolibon” tashqi ishlar vaziri vazifasini bajaruvchi Amir Xon Mutaqqiy Afg‘onistonga qo‘shni uch davlatni ISHIDni qo‘llab-quvvatlayotganlikda aybladi. Bu haqda Etilaatroz xabar berdi.
Mutaqqiy 25-aprel kuni Kobuldagi “Afg‘on—Qozoq” ko‘rgazmasining ochilish marosimida tegishli bayonot berdi. U ISHID uchun Afg‘onistonda joy yo‘qligi, biroq uchta qo‘shni davlat ISHIDni ishchi kuchi bilan ta’minlab, uni moliyalashtirayotganini qayd etdi.
“Tolibon” mulozimi bu aynan qaysi davlatlar ekanini aytmadi.
“Afsuski, bu davlatlardan biri ISHIDning ishchi kuchini ta’minlasa, ikkinchisi ta’lim dasturlarini moliyalashtirib, markazlashuvini ta’minlaydi, uchinchi davlat esa guruh hujumlarini boshqaradi” — dedi u.
Mutaqqiy, agar bu uch davlat o‘z majburiyatlarini bajarsa, Afg‘onistonda muammo yo‘qligini qo‘shimcha qildi. “Tolibon” qo‘shni davlatlarni ISHIDni qo‘llab-quvvatlashda ayblagan bir paytda qo‘shni davlatlar Afg‘onistondagi terrorchilik guruhlari faolligidan xavotirda.
24-aprel kuni Pokistonga tashrif buyurgan Eron prezidenti Ibrohim Raisiy Pokiston bosh vaziri bilan qo‘shma bayonotida Afg‘onistonda terrorchilik tashkilotlari mavjudligini mintaqa va dunyo xavfsizligiga jiddiy tahdid deb atadi. Pokiston rasmiylari bundan oldin ham ko‘p marotaba afg‘on fuqarolari mamlakatdagi hujumlarda ishtirok etganini da’vo qilgan. “Tolibon” esa Afg‘onistondagi hujumlarda Pokiston va Tojikiston fuqarolari ishtirok etganini bir necha bor ta’kidlagan.
Izoh (0)