U-23 Osiyo Kubogi. Yaponiya Qatarni musobaqadan chiqarib yubordi, Indoneziya penaltilar seriyasida Janubiy Koreyadan ustun keldi

Futbol bo‘yicha U-23 Osiyo Kubogi chorak finalidan o‘rin olgan o‘yinlar 25-aprel, payshanba kuni bo‘lib o‘tdi.

Yaponiya musobaqa mezboni Qatarga qarshi bahs olib bordi. Uchrashuvning 2-daqiqasida Yamada hisobni ochdi. 24-daqiqada Ar-Ravi muvozanatni tikladi. 41-daqiqada Balideh qizil kartochka olib, maydonni tark etdi. Qolgan daqiqalarda Qatar bir kishi kam bo‘lib harakat qiladigan bo‘ldi. Birinchi bo‘lim durang natija bilan yakunlandi.

Ikkinchi bo‘lim boshida Abdulsallam qatarliklarni hisobda oldinga olib chiqdi. 67-daqiqada Kimura hisobni tenglashtirdi. Asosiy bo‘limlar durang bilan yakunlanganidan so‘ng jamoalar qo‘shimcha bo‘limlarga murojaat qildi. Qo‘shimcha bo‘limlarda esa yaponlar yana 2 ta gol urdi. 101-daqiqada Hosoya Yaponiyaning 3-goliga mualliflik qildi. 113-daqiqada Uchino uchrashuvga yakuniy nuqtani qo‘ydi.

Shu tariqa Yaponiya 4:2 hisobida g‘alaba qozonib, yarim final yo‘llanmasini qo‘lga kiritdi.

Yana bir chorak final o‘yinida Janubiy Koreya Indoneziyaga qarshi bahs olib bordi. Asosiy bo‘limlarda 2:2 hisobi qayd etildi. Qo‘shimcha bo‘limlarda esa darvozalar ishg‘ol etilmadi. G‘olib nomini aniqlash uchun penaltilar seriyasiga murojaat qilindi. 

Penaltilar seriyasida esa Indoneziya 11:10 hisobida g‘alaba qozonib, keyingi bosqichga yo‘l oldi.

Shu tariqa 25-aprel kungi bahslarda Yaponiya hamda Indoneziya yarim final yo‘llanmasini naqd qilgan terma jamoalarga aylandi.

U-23 Osiyo Kubogi

Chorak final

25-aprel, payshanba

Qatar U-23 – Yaponiya U-23 2:4

Gollar: Fuki Yamada (2), Ahmad Ar-Ravi (24), Jasim Gabir (49), Siji Kimura (67), Mao Hosoya (101), Kotaro Uchino (112).

Janubiy Koreya U-23 – Indoneziya U-23 2:2

Penaltilar seriyasi: 10:11

Gollar: Rafael Struik (16), Tegu (45, avtogol), Rafael Struik (45+3), Jong San Bin (84).