Qozog‘istonda TikTok bloklanishi mumkin. Bu haqda madaniyat va axborot vaziri Aida Balayeva ma’lum qildi.
Vazirning ta’kidlashicha, ijtimoiy tarmoqda noqonuniy kontent tarqatilmoqda.
“Ijtimoiy tarmoqlarda noqonuniy kontentlar soni ortib boryapti. Global tendensiya davom etmoqda, ko‘plab davlatlar ba’zi ijtimoiy tarmoqlardan voz kechishga majbur bo‘lmoqda”, — deydi Balayeva.
Jurnalistlarning gap qaysi ijtimoiy tarmoqlar haqida ketayotganiga oydinlik kiritish so‘roviga javoban Balayeva “bu TikTok” ekanini aytdi.
“Menimcha, vazir sifatida buni ko‘rib chiqish kerak, deb hisoblayman. Yana bir savol shundaki, hamma choralar ham ommabop emas, hammasi ham yoqavermaydi. Shunga qaramay, vazifamiz barqarorlik va hamjihatlikni saqlashdir”, — deya qo‘shimcha qildi Balayeva.
Qirg‘izistonda TikTok bloklangan
Qirg‘iziston Raqamli rivojlanish vazirligi 19-aprel kuni TikTok bloklanishini eʼlon qildi.
“Aloqa sohasini tartibga solish va nazorat qilish xizmati aloqa operatorlariga TikTok xizmatiga kirishni cheklash choralarini ko‘rish zarurligi to‘g‘risida xat yuborgan”, — dedi vazirlik.
Bunga TikTok tomonidan “Qirg‘izistonda bolalar salomatligi va jismoniy, intellektual, aqliy, maʼnaviy va axloqiy rivojlanishiga zarar yetkazilishining oldini olish chora-tadbirlari to‘g‘risida”gi qonunga rioya qilmaslik asos bo‘lgan.
Rossiyada ham TikTok bloklanishi mumkin
Aprel oyi o‘rtalarida “Roskomnadzor” Rossiyada TikTok’ni bloklashni taklif qilgandi.
“Bu VK Video, Yappy, Zen va boshqalar mahalliy platformalarga o‘z auditoriyasini 30 million kishiga ko‘paytirish imkonini beradi, pul ishlash uchun ko‘proq imkoniyatlarni ochadi”, — degan “Rospotrebnadzor”.
TikTok 2022-yilning mart oyida “Rossiya armiyasi haqida soxta xabar tarqatganlik” uchun jinoiy javobgarlik joriy qilinganidan keyin Rossiyada o‘z faoliyatini cheklagandi. O‘shandan beri rossiyalik foydalanuvchilar yangi kontentni jonli efirga uzatish, joylash yoki ko‘rish imkoniga ega emas.
Izoh (0)