Mutaxassislarning prognozlariga ko‘ra, toshqindan keyin Qozog‘iston qurg‘oqchilikka duchor bo‘lishi mumkin. Tahlilchilar, shuningdek, toshqin tuproqning unumdor qatlamini yuvib ketganidan xavotirda. Bu haqda “Informbyuro 31” xabar berdi.
Mutaxassislarning fikricha, Qozog‘istondagi suv toshqinlari hosilga salbiy ta’sir ko‘rsatadi. Suv tuproqning butun unumdor qatlamini yuvib yuborgan. Lekin eng tashvishlisi — kelayotgan yoz quruq bo‘lishi mumkin.
Har yili isish jarayoni yanada shiddatli va kuchliroq tus olmoqda. Agar bahorda suv bossa, yozda suv bo‘lmaydi. Endi esa bu suvlarning hammasini to‘plash uchun sug‘orish kanallari, omborli kanallar qurishimiz kerak, — deydi jamoat birlashmasi rahbari Timur Eleusizov.
Mutaxassislar suvni bir joyga yig‘ish uchun ko‘proq suv omborlari yoki “voronkalar” qurishni taklif qilmoqda. Ulardan keyinchalik sug‘orish va baliq yetishtirish uchun foydalanish mumkin.
Water Hub xalqaro tadqiqot markazi direktori Anatoliy Ryabtsevning ayticha, suv bosganda yoki biror joyda kuchli yog‘ingarchilik bo‘lsa, bu quruq shamolni, quruq ob-havoning kirib kelishini anglatadi.
“Kazgidromet” kuzgi dala o‘rganish natijalarini e’lon qilgan: Aqmo‘la viloyatida va Qozog‘istonning aksariyat qismida tuproqning qoniqarli namligi qayd etilgan, bu kelajakdagi hosil uchun ijobiy shart-sharoitlarni ta’minlaydi.
Iyun oyida Aqmo‘la viloyatining aksariyat hududlarida o‘rtacha havo harorati me’yordan yuqori bo‘lishi kutilmoqda. Iyul va avgust oylaridagi prognozlarga ko‘ra, havo harorati meʼyorda, iyulda yog‘ingarchilik miqdori meʼyordan yuqori, avgustda esa meʼyor atrofida bo‘lishi kutilmoqda, — deydi yetakchi agrometeorolog muhandis Oygul Kantaeva.
Izoh (0)