Qozog‘iston prezidenti Qosim-Jo‘mart To‘qayev veyplarni mamlakatga olib kirish, ishlab chiqarish va sotishni taqiqlashni nazarda tutuvchi qonunni imzoladi. Bu haqda Akorda xabar berdi.
Mamlakatda bunday harakatlar uchun jinoiy javobgarlik belgilanadi. Veyplarni sotish 200 oylik hisob ko‘rsatkichi (1,6 ming dollar) miqdorida jarimaga tortishni yoki 50 sutkagacha hibsga olishni nazarda tutadi.
Elektron iste’mol tizimlarini (veyp) olib kirish va ishlab chiqarish 2000 oylik hisob ko‘rsatkichi (16,5 ming dollar)gacha jarima, ikki yilgacha ozodlikni cheklash yoki xuddi shu muddatga ozodlikdan mahrum qilish bilan jazolanadi.
Qonun, shuningdek, chekilmaydigan tamaki mahsulotlari, veyplar, aromatizatorlar va ular uchun suyuqliklarni reklama qilishni taqiqlaydi. Qonun matbuotda rasmiy e’lon qilingan kundan boshlab 60 kun o‘tgach kuchga kiradi.
Qozog‘istonda nos va chilimga ham taqiq qo‘yilmoqda
Qozog‘iston prezidenti Qosim-Jo‘mart To‘qayev 15-mart kuni Milliy qurultoy yig‘ilishida aholining sog‘lig‘iga zarar yetkazuvchi giyohvandlik va boshqa moddalar, jumladan, nosvoyning zarari haqida gapirdi.
Shundan keyin 18—31-mart kunlari aholi o‘rtasida nosvoyning zarari, uni sotish bo‘yicha taqiqlangan talablarga tadbirkorlar tomonidan rioya qilish zarurligi haqida huquqiy tushuntirish ishlari olib borildi. “Xalq salomatligi va sog‘liqni saqlash tizimi to‘g‘risida”gi kodeksda chekilmaydigan tamaki mahsulotlarini, jumladan, nosvoyni olib kirish, ishlab chiqarish, sotish va tarqatishni taqiqlash nazarda tutilgan.
Unga ko‘ra, chekmaydigan tamaki mahsulotlarini noqonuniy sotish 25 oylik hisob-kitob ko‘rsatkichi miqdorida yoki 92 ming tengedan ortiq (taxminan 2 million 571 ming) miqdorda jarima tortishga sabab bo‘ladi. Savdo qoidalarini buzish faktlari aniqlansa, aybdorlar qonun hujjatlarida belgilangan tartibda javobgarlikka tortiladi.
Hozirda Qozog‘iston Sog‘liqni saqlash vazirligi mamlakatda chilimga to‘liq taqiq joriy etish masalasini muhokama qilmoqda. Amaldagi qonunchilikda jamoat joylarida chilim uchun tabaka, chilim aralashmasini iste’mol qilish taqiqlanadi. Belgilanmagan joylarda chilim chekkanlik uchun jismoniy shaxslarga 2024-yilda 55 380 dan 184 600 tengegacha (1 mln 580 mingdan 26 mln 212 ming so‘mgacha) jarima belgilangan. Biroq SSV jarima miqdori yetarli darajada bo‘lmagani uchun qonunga amal qilinmayotganini ta’kidlagan.
Izoh (0)