Қозоғистонда TikTok блокланиши мумкин. Бу ҳақда маданият ва ахборот вазири Аида Балаева маълум қилди.
Вазирнинг таъкидлашича, ижтимоий тармоқда ноқонуний контент тарқатилмоқда.
“Ижтимоий тармоқларда ноқонуний контентлар сони ортиб боряпти. Глобал тенденция давом этмоқда, кўплаб давлатлар баъзи ижтимоий тармоқлардан воз кечишга мажбур бўлмоқда”, — дейди Балаева.
Журналистларнинг гап қайси ижтимоий тармоқлар ҳақида кетаётганига ойдинлик киритиш сўровига жавобан Балаева “бу TikTok” эканини айтди.
“Менимча, вазир сифатида буни кўриб чиқиш керак, деб ҳисоблайман. Яна бир савол шундаки, ҳамма чоралар ҳам оммабоп эмас, ҳаммаси ҳам ёқавермайди. Шунга қарамай, вазифамиз барқарорлик ва ҳамжиҳатликни сақлашдир”, — дея қўшимча қилди Балаева.
Қирғизистонда TikTok блокланган
Қирғизистон Рақамли ривожланиш вазирлиги 19 апрель куни TikTok блокланишини эълон қилди.
“Алоқа соҳасини тартибга солиш ва назорат қилиш хизмати алоқа операторларига TikTok хизматига киришни чеклаш чораларини кўриш зарурлиги тўғрисида хат юборган”, — деди вазирлик.
Бунга TikTok томонидан “Қирғизистонда болалар саломатлиги ва жисмоний, интеллектуал, ақлий, маънавий ва ахлоқий ривожланишига зарар етказилишининг олдини олиш чора-тадбирлари тўғрисида”ги қонунга риоя қилмаслик асос бўлган.
Россияда ҳам TikTok блокланиши мумкин
Апрель ойи ўрталарида “Роскомнадзор” Россияда TikTok’ни блоклашни таклиф қилганди.
“Бу VK Video, Yappy, Zen ва бошқалар маҳаллий платформаларга ўз аудиториясини 30 миллион кишига кўпайтириш имконини беради, пул ишлаш учун кўпроқ имкониятларни очади”, — деган “Роспотребнадзор”.
TikTok 2022 йилнинг март ойида “Россия армияси ҳақида сохта хабар тарқатганлик” учун жиноий жавобгарлик жорий қилинганидан кейин Россияда ўз фаолиятини чеклаганди. Ўшандан бери россиялик фойдаланувчилар янги контентни жонли эфирга узатиш, жойлаш ёки кўриш имконига эга эмас.
Изоҳ (0)