Sirdaryo viloyatida tadbirkorning 943,1 million so‘mlik materiallarini o‘zlashtirgan sobiq menejer aniqlandi, deb xabar beradi Bosh prokuratura huzuridagi departament.
Qayd etilishicha, departamentning Sardoba tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruvda “I.A.” MCHJning transport bo‘limi sobiq menejeri M.X. umuman harakatlanmagan yoki qisqa masofaga harakatlangan avtotransport vositalariga yonilg‘i-moylash materiallari sarf qilingani to‘g‘risida hujjatlarni rasmiylashtirib, tadbirkorning jami 943,1 million so‘mlik mahsulotini talon-toroj qilgani aniqlangan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Samarqandda ijaraga berilgan 1,3 milliard so‘mlik bino buzilib, qurilish materiallari sotib yuborilgani to‘g‘risida xabar berilgandi. Mart oxirlarida esa departament xodimlari tomonidan Navoiyda ijaraga berilgan 1 gektar yerni 5 ming dollarga sotishga uringan shaxs ushlangan edi.
Izoh (0)