Urganch shahrida va Toshkent viloyatining Yangiyo‘l tumanida qurilish va taʼmirlashdagi talon-torojliklar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti axborot xizmati xabar berdi.
Maʼlum qilinishicha, departamentning Urganch shahar bo‘limi tomonidan o‘tkazilgan tergovga qadar tekshiruvda Xorazm viloyati avtomobil yo‘llari bosh boshqarmasi masʼul shaxslari va boshqalar Urganch shahridagi temiryo‘l ustidan o‘tuvchi ko‘prikni rekonstruksiya qilishda rasmiy hujjatlarga amalda bajarilmagan qurilish-taʼmirlash ishlarini qo‘shib yozish orqali jami 549,3 mln so‘mni o‘zlashtirish yo‘li bilan talon-toroj qilganliklari aniqlangan.
Shu kabi, departamentning Yangiyo‘l tuman bo‘limi tomonidan o‘tkazilgan tergovga qadar tekshiruvda Yangiyo‘l tuman Obodonlashtirish boshqarmasi va “T.F.” MCHJ masʼul shaxslari o‘zaro til biriktirib, Qirariq ko‘chasidagi 592 metr yo‘l asfalt qilingan bo‘lsa-da, 2023-yilning 26-oktyabrida ushbu ko‘chani asfalt qilish bo‘yicha “Shaffof” platformasiga qo‘yib, tanlovda “T.F.” MCHJ g‘olib bo‘lgach MCHJ rahbari F.T. bilan kelishib, rasmiy hujjatlarga soxta maʼlumotlar kiritish orqali jami 239,8 mln so‘mni o‘zlashtirish yo‘li bilan talon-toroj qilganliklari aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)