Argentina mudofaa vaziri Luis Petri Daniyada 24 ta F-16 jangovar samolyotlarini sotib olish bo‘yicha kelishuvni imzoladi. Bu haqda Argentina mudofaa vazirligining hukumat rasmiy saytida chop etilgan bayonotida aytiladi.
“Bugun biz Argentina Harbiy-havo kuchlari uchun 1983-yildan beri eng muhim bo‘lgan xaridni yakunladik. Endilikda modernizatsiya qilingan va eng yaxshi texnologiya bilan jihozlangan, bugungi kunda Janubiy Amerikadagi eng yaxshi samolyotlar bilan teng bo‘lgan 24 ta F-16 samolyotiga ega bo‘lamiz”, — dedi Petri.
“Ushbu yangi samolyotlar bilan biz mudofaa siyosatimizda oldinga muhim qadam tashlaymiz, aviatsiyamizni tovushdan yuqori tezlikda uchadigan samolyotlar bilan ta’minlaymiz”, — deya qo‘shimcha qildi Argentina mudofaa vaziri.
Mudofaa vazirligi bayonotiga ko‘ra, F-16 qiruvchi samolyotlari Argentina havo mudofaa tizimining yangi asosiga aylanadi. Ilgari bu vazifani 40 yildan ortiq vaqt davomida Fransiyaning Dassault Mirage samolyotlari bajargan.
26-mart kuni Argentina va Daniya mudofaa vazirliklari rahbarlari Buenos-Ayresdagi uchrashuvda bu bo‘yicha kelishuvga erishgandilar.
Izoh (0)