Turkiya Milliy mudofaa vazirligi 13-aprel kuni Turkiya xavfsizlik kuchlari Iroq shimolida Kurdiston ishchi partiyasiga aloqador to‘rt nafar terrorchini yo‘q qilganini maʼlum qildi. Bu haqda batafsil Anadolu nashri xabar berdi.
“Qurolli kuchlarimiz maxsus harbiy amaliyot hududida 3 nafar Kurdiston ishchi partiyasi terrorchisini, Iroq shimolidagi Hakurk hududida esa 1 nafar terrorchini yo‘q qildi”, — deyiladi vazirlik xabarida.
Turkiya rasmiylari Iroq shimolidagi aksilterror operatsiya hali davom etishini maʼlum qilgan. Mamlakat janubi-sharqiy hududlarida xavfsizlik tadbirlari kuchaytirilishi maʼlum qilingan.
“Terrorizmga qarshi kurashimiz samarali va qatʼiy davom ettirilmoqda”, — deyiladi rasmiy xabarda.
Kurdiston ishchi partiyasi Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Ushbu partiya Turkiyaga qarshi qariyb 40 yildan beri terror kampaniyasi olib borishi aytiladi. Tashkilot uyushtirgan teraktlarda shu paytga qadar Turkiya hududida 40 ming nafardan ortiq kishi, jumladan, ayollar, bolalar va go‘daklar halok bo‘lgan.
Turkiya hukumati 2022-yilning aprel oyida Iroqning shimolidagi Metina, Zap va Turkiya chegarasiga yaqin Avasin-Basyan hududlarida Kurdiston ishchi partiyasining boshpanalarini nishonga olish uchun maxsus operatsiya boshlagan edi.
Izoh (0)