Turkiya xavfsizlik kuchlari Iroq shimolida Kurdiston ishchilar partiyasining 27 ta nishonini yo‘q qildi. Bu haqda Anadolu nashri hukumat manbalariga asoslanib, xabar berdi.
Xabarda aytilishicha, partiyaning Metina, Zap, Gara, Qandil va Hakurk hududlaridagi nishonlari havo hujumlarida yo‘q qilingan. Guruhlarning harbiy salohiyati yakson qilingan.
Oldinroq Anqaradagi hukumat Kurdiston ishchilar partiyasi jangari guruhlari Turkiya chegara hududlariga hujumlar tashkil etish uchun Shimoliy Iroq tog‘li hududlarida mustahkam joylashib olganini maʼlum qilgan edi. Qo‘poruvchiliklarning oldini olish uchun rasmiylar aksilterror operatsiya o‘tkazishga qaror qilgan.
Kurdiston ishchilar partiyasi 35-yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 mingdan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)