Qashqadaryo viloyatining Shahrisabz tumanidagi G‘elon qishlog‘i nafaqat mahalliy, xorijlik sayyohlarni ham o‘ziga rom etgan qishloqlardan biri hisoblanadi. Qishloq aholisi har mavsumda minglab nafar sayohatchilarga mezbonlik qilib, ona tabiatdan bahra olishiga ko‘maklashadi. Qashqadaryolik bloger Azizbek Yazdurdiyev kecha shu qishloqda bo‘lib, “Daryo” internet nashri uchun maxsus reportaj tayyorladi.
Tuman markazidan taxminan 80-85 kilometr uzoqlikda joylashgan qishloqqa ilgari faqatgina Niva rusumli yo‘ltanlamas avtomobillar orqali chiqish mumkin bo‘lgan.
Aniqlashtirilishicha, ushbu qishloqdagi 1300 dan ortiq xonadonlarda 6 ming nafarga yaqin fuqaro istiqomat qiladi.
G‘elon qishlog‘iga olib boruvchi yo‘llar ilgari abgor va qo‘rqinchli bo‘lgan bo‘lsa, ayni kunda nafaqat qishloqning ichki ko‘chalari, tuman markazidan ushbu qishloqqa eltuvchi asosiy yo‘l ham asfaltlashtirilib, aholi uchun qulay sharoitlar yaratilgan.
2016—2017-yillargacha bo‘lgan davrda ushbu qishloqqa kirib-chiqishda ma’lum bir cheklovlar borligi, yo‘llar abgorligi, kelib-ketish qiyinligi sabab aholi tuman markazidan, dunyodan uzilib qolgan bo‘lgan. Bugungi kundagi o‘zgarishlar odamlarning kayfiyatiga ham ijobiy ta’sir ko‘rsatgan. Ular bugungi hayotidan judayam mamnun, — deydi qishloq odamlari haqida gapirgan bloger.
Izoh (0)