Қашқадарё вилоятининг Шаҳрисабз туманидаги Ғeлон қишлоғи нафақат маҳаллий, хорижлик сайёҳларни ҳам ўзига ром этган қишлоқлардан бири ҳисобланади. Қишлоқ аҳолиси ҳар мавсумда минглаб нафар саёҳатчиларга мезбонлик қилиб, она табиатдан баҳра олишига кўмаклашади. Қашқадарёлик блогер Азизбек Яздурдиев кеча шу қишлоқда бўлиб, “Дарё” интернет нашри учун махсус репортаж тайёрлади.
Туман марказидан тахминан 80-85 километр узоқликда жойлашган қишлоққа илгари фақатгина “Нива” русумли йўлтанламас автомобиллар орқали чиқиш мумкин бўлган.
Аниқлаштирилишича, ушбу қишлоқдаги 1300 дан ортиқ хонадонларда 6 минг нафарга яқин фуқаро истиқомат қилади.
Ғeлон қишлоғига олиб борувчи йўллар илгари абгор ва қўрқинчли бўлган бўлса, айни кунда нафақат қишлоқнинг ички кўчалари, туман марказидан ушбу қишлоққа элтувчи асосий йўл ҳам асфалтлаштирилиб, аҳоли учун қулай шароитлар яратилган.
2016—2017 йилларгача бўлган даврда ушбу қишлоққа кириб-чиқишда маълум бир чекловлар борлиги, йўллар абгорлиги, келиб-кетиш қийинлиги сабаб аҳоли туман марказидан, дунёдан узилиб қолган бўлган. Бугунги кундаги ўзгаришлар одамларнинг кайфиятига ҳам ижобий таъсир кўрсатган. Улар бугунги ҳаётидан жудаям мамнун, — дейди қишлоқ одамлари ҳақида гапирган блогер.
Изоҳ (0)