Ijtimoiy tarmoqlarda bolani qo‘rqitish usulida davolashga uringan ayol, “defektolog” D.J.ga tegishli “Ovoz” markazi tashkil etilgani haqida xabar tarqaldi. Bolalar ombudsmani mutasaddi idoralar bilan birgalikda mazkur holatni o‘rgandi.
Namangan viloyati Maktabgacha va maktab ta’limi boshqarmasining ma’lumotlariga ko‘ra, Namangan shahar Yangi Namangan tumanida fuqaro D.J.ga tegishli “Ovoz” nomli hech qanday ta’lim muassasasi qayd etilmagan bo‘lib, mazkur hududda so‘nggi vaqt mobaynida ham bunday turdagi hech bir nodavlat ta’lim muassasasi ochilmagan.
Aniqlanishicha, “Ovoz” MCHJga tegishli “Ovoz akademiyasi o‘quv markazi” Toshkent viloyatida ro‘yxatdan o‘tgan bo‘lib, ushbu markaz Namangan shahrining Yangi Namangan tumanida ijara shaklida o‘z faoliyatini boshlagan. D.J. esa ushbu maskanning ochilish marosimiga tashkilotchilar tomonidan reklama maqsadida taklif etilgan.
Joriy yilning 27-fevral kuni D.J.ga nisbatan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilgan.
Hozirda jinoyat ishi tergovi davomida D.J.ning bolalar duduqlanishi muammosiga oid har qanday faoliyat bilan shug‘ullanishi to‘xtatilgan bo‘lib, u bunday xizmat ko‘rsatishni davom ettirmaslik yuzasidan tegishli tartibda ogohlantirilgan. Hozirda tergov harakatlari olib borilmoqda.
Avvalroq Xorazmdagi xususiy bog‘chada bolalarga qo‘pollik qilgan tarbiyachi ishdan olingani to‘g‘risida xabar berilgandi. Shuningdek, Namangan viloyati Maktabgacha va maktab taʼlimi boshqarmasi Chust tumanida bog‘cha bolalarini kaltaklagani tasvirlangan videodagi tarbiyachi yuzasidan ma’lumot bergandi.
Izoh (0)