Qashqadaryo viloyatining Shahrisabz tumanidagi Ko‘l qishlog‘iga sel keldi. Bu haqda “Daryo”ga xabar bergan tuman hokimligi axborot xizmati rahbari Bahodir Halimovning aytishicha, sel kelishi oqibatida qishloqqa olib kiruvchi yo‘l 10 soat davomida yopilib qolgan.
“Bugun (2021-yilning 20-iyul kuni nazarda tutilmoqda - tah.) tong azonlab tumanning tog‘li hududlarida kuchli yomg‘ir va do‘l yog‘di. Natijada to‘planib qolgan mayda tosh zarralarining sel toshqinida oqib kelishi Ko‘l qishlog‘iga olib boradigan yo‘lning holatiga zarar yetkazdi. Hamda yo‘lda qatnov to‘xtatildi. Vaziyatdan xabar topgan tuman hokimligi zaruriy texnikalar va yoqilg‘i mahsulotlarini voqea joyiga yubordi”, — deydi hokimlik axborot xizmati rahbari Bahodir Halimov.
Ta’kidlanishicha, seldan talafot ko‘rgan yo‘lni ta’mirlash ishlari bugun, soat 15:00 ga qadar davom etgan. Unga qadar oziq-ovqatga ehtiyoj sezgan fuqarolarga oziq-ovqat mahsulotlari ham topshirilgan.
“Soat 15:00 da vaziyat barqarorlashib, yo‘l holati yaxshilandi va avtomobil qatnovi tiklandi”, — deydi hokimlik mas’uli.
Eslatib o‘tamiz, Qo‘l qishlog‘i Shahrisabz tumani markazidan 86 kilometr uzoqlikda joylashgan bo‘lib, qishloqda qish oyida ikki metrgacha qor yog‘ishi kuzatiladi. Oqibatda esa qishloqqa olib kiruvchi yagona yo‘l 10 kunlab yopilib qolish ehtimoli bor.
Mavzuga doir:
- Fotoreportaj: Qishda 10 kunlab dunyodan uzilib qoladigan Shahrisabzdagi Ko‘l qishlog‘ida bir kun
- Qor yog‘sa, tashqi dunyodan uzilib qoladigan Shahrisabzning Ko‘l qishlog‘i uchun qishgacha yo‘ltanlamas tez yordam mashinasi olib kelinadigan bo‘ldi
- Qor yog‘sa, tashqi dunyodan uzilib qoladigan Shahrisabzdagi qishloq aholisiga va’da qilingan yo‘ltanlamas tez yordam mashinasi topshirildi
Izoh (0)