O‘zbekiston tashqi ishlar vaziri Baxtiyor Saidov Ummon hamda Kuvayt tashqi ishlar vazirlari bilan uchrashuvlar o‘tkazdi. Bu haqda vazirning Telegram-kanalida xabar berildi.
Maʼlum qilinishicha, Ummon tashqi ishlar vaziri Badr Albusaydiy bilan o‘tkazilgan uchrashuvda ham mintaqaviy, ham global vaziyatga to‘xtalib o‘tildi.
“O‘zbekiston bilan Ummon o‘rtasida investitsiyadan tortib madaniy hamkorlikkacha bo‘lgan ko‘plab sohalarda aloqalarimizni yanada rivojlantirish uchun ulkan salohiyat mavjudligini alohida taʼkidladik. Tashqi ishlar vazirliklarimiz o‘rtasida 2024—2026-yillarga mo‘ljallangan hamkorlik dasturini imzoladik”, – deyiladi xabarda.
Shuningdek, Baxtiyor Saidov Kuvayt tashqi ishlar vaziri Abdulloh Ali al-Yahyo bilan ham uchrashuv o‘tkazdi.
“Muloqotda hamkorligimizning huquqiy asoslarini mustahkamlash, investitsiyaviy aloqalarni kengaytirish, barcha sohalarda almashinuvlarni jadallashtirish masalalarini muhokama qildik. Mamlakatlarimiz o‘rtasida munosabatlarni har tomonlama rivojlantirish uchun hali foydalanilmagan ulkan imkoniyatlar mavjud. Shuningdek, O‘zbekiston va Kuvayt tashqi ishlar vazirliklari o‘rtasida 2024—2026-yillarga mo‘ljallangan hamkorlik dasturini imzoladik”, – deyiladi xabarda.
Izoh (0)