Вьетнамлик кўчмас мулк магнати Чионг Ми Лан 11 апрель куни Хошимин шаҳар суди томонидан мамлакат тарихидаги энг йирик молиявий фирибгарлик иши бўйича ўлимга ҳукм қилинди. Бу ҳақда BBC хабар берди.
67 ёшли Van Thinh Phat компанияси раҳбари Чионг Ми Лан молиявий жиноятлар учун Вьетнамда ўлимга ҳукм қилинган кам сонли аёллардан биридир. Фирибгарликнинг кўлами ҳам мисли кўрилмаган. У тижорат банкидан 304 триллион донг (тахминан 12,5 миллиард доллар) кредит олганликда айбдор деб топилган.
Бироқ унинг ҳаракатларидан кўрилган жами зарар 27 миллиард долларга баҳоланмоқда ва суд ҳукми уни айнан шу суммани қайтаришга мажбур қилмоқда, гарчи айблов бунинг иложи йўқ деб ҳисобласа ҳам.
Тахминларга кўра, суд аёлга босим ўтказиш ва ҳеч бўлмаганда ўғирланган мулкнинг бир қисмини қайтаришга мажбурлаш учун уни ўлимга ҳукм қилган. Миллиардер айбини тан олмаган ва айбни қўл остидагиларга юклаган. Ланнинг оила аъзоларидан бири Reuters агентлигига у ҳукм устидан шикоят қилишни режалаштираётганини айтди.
Чионг Ми Лан 2012 йилдан 2022 йилгача Сайгон тижорат банкини (СCБ) ўнлаб сохта одамлар орқали бошқариб, маблағларни минглаб “арвоҳ компаниялар” орқали ўтказиб, ҳукумат амалдорларига пора берган, — дейди маҳаллий ОАВ.
Прокуратура маълумотларига кўра, 2018 йил бошидан 2022 йил октябригача ҳукумат СCБга молиявий ёрдам кўрсатаётганда, Лан катта миқдордаги маблағни ўзлаштирган ва бир вақтнинг ўзида ширкатларга ноқонуний кредитлар берган.
Ланнинг 2022 йил октябрь ойида ҳибсга олиниши Вьетнамда коррупцияга қарши давом этаётган курашдаги энг шов-шувли воқеалардан бири бўлди.
“Ёнаётган ўчоқ” деб номланган кампания Вьетнам сиёсатининг энг юқори қатламларига таъсир кўрсатди, юзлаб юқори мартабали ҳукумат амалдорлари ва бизнес раҳбарларига импичмент эълон қилинди ёки истеъфога чиқишга мажбур бўлди. Ўтган ноябрь ойида Вьетнам Коммунистик партияси бош котиби Нгуэн Фу Чонг “коррупцияга қарши кураш узоқ муддатда давом этишини эълон қилганди.
Изоҳ (0)