Pokistonda 22 yoshli talaba WhatsApp platformasi orqali kufr keltirganlikda ayblanib, o‘limga hukm qilindi. Bu haqda BBC xabar berdi.
Panjob viloyati sudi ayblanuvchi WhatsApp’da foto va videolarni musulmonlarning diniy tuyg‘ulariga putur yetkazish maqsadida tarqatganini aytdi. Xuddi shunday ayblov bilan 17 yoshli bola umrbod qamoq jazosiga hukm qilindi. Ikkala ayblanuvchi ham qonunbuzarlikni rad etmoqda.
Pokistonda kufr o‘lim bilan jazolanadi. Ayrim gumonlanuvchilar ishi sudgacha yetib bormasdan oldin qatl qilinadi. Sud qarorida aytilishicha, 22 yoshli yigit Muhammad payg‘ambar va uning rafiqalarini haqorat qiluvchi foto va videolarni yasagani uchun o‘lim jazosiga hukm qilingan. Ikkinchi ayblanuvchi esa materiallar tarqatgani uchun umrbodga qamalmoqda.
O‘lim jazosiga hukm qilingan mahbusning otasi Lahor Oliy sudiga apellyatsiya shikoyati berayotganini aytdi.
Pokistonda islom dinini yoki Muhammad payg‘ambarni haqorat qilishda aybdor deb topilgan har qanday shaxs o‘lim yoki umrbod qamoq jazosiga hukm qilinishi mumkin. Misol tariqasida, Pokistonda erkak WhatsApp’ga joylashtirgan kontenti sabab o‘limga hukm qilingandi. Pokistonda kufr juda nozik masala bo‘lib, hatto isbotlanmagan ayblovlar ham zo‘ravonlikni qo‘zg‘atishi mumkin.
Pokiston rasmiylari o‘tgan fevral oyida “kufrona” kontentni olib tashlash talablarini bajarmagani uchun Wikipedia veb-ensiklopediyasini bloklagandi. Wikipedia kompaniyasiga ushbu ma’lumotlarni o‘chirish uchun 48 soat vaqt berilgandi. Na nashr, na Pokiston rasmiylari qaysi “kufrona” kontentni nazarda tutgani haqida ma’lumot berilgan.
Izoh (0)