Isroilning G‘azoga uyushtirgan havo hujumi natijasida HAMAS harakati rahbari Ismoil Haniyaning uch o‘g‘li halok bo‘ldi. Isroil mudofaa kuchlari bu ma’lumotni tasdiqladi, deya Al Jazeera xabar berdi.
Ma’lum bo‘lishicha, G‘azo g‘arbidagi qochqinlar lageriga uyushtirilgan zarbada Haniyaning uch o‘g‘li — Hazem, Amir va Muhammad Ismoil va ikki nabirasi ham halok bo‘lgan.
Isroil harbiy-havo kuchlari aviatsiyasi G‘azo markazida terrorchilik faoliyatini amalga oshirayotgan HAMASning uchta jangarisiga zarba berdi, — deyiladi Isroil harbiylari bayonotida.
Bular Haniya oilasining urush paytida halok bo‘lgan birinchi a’zolari emas: fevralda yana bir o‘g‘li, oktyabrda uning ukasi va jiyani, noyabrda esa nabirasi halok bo‘lgani xabar qilingan edi. Haniya o‘z farzandlari va nabiralarini “shahidlar” deb atagan va yaqinlarining o‘limi davom etayotgan sulh muzokaralaridagi HAMASning pozitsiyasini o‘zgartirmasligini qo‘shimcha qilgan.
Bizning talablarimiz aniq, biz yon bermaymiz. Agar dushman muzokaralar o‘rtasida o‘g‘illarimga hujum qilish pozitsiyamizni o‘zgartirishga undaydi, deb o‘ylasa, adashadi, —dedi Haniya Al Jazeera bilan suhbatda.
HAMAS doimiy o‘t ochishni to‘xtatish, Isroil qo‘shinlarini to‘liq olib chiqish va ko‘chirilgan falastinliklarni G‘azo shimoliga qaytarish haqidagi dastlabki talablariga sodiq qolmoqda. Isroil bosh vaziri Binyamin Netanyaxuning ta’kidlashicha, Isroil guruh yo‘q qilinmaguncha va barcha isroillik garovga olinganlar ozod etilmaguncha kurashni davom ettiradi.
Avvalroq Isroil kelgusidagi operatsiyalarga tayyorgarlik ko‘rish uchun o‘z qo‘shinlarini G‘azo janubidan olib chiqqanini aytgan, biroq anklav bo‘ylab vaqti-vaqti bilan harbiy amaliyotlar davom etmoqda.
Izoh (0)