Enter Engineering kompaniyasi maosh olmagani uchun ish tashlash qilgan minglab xodimlarining ommaviy chiqishidan so‘ng, bugun, 9-aprel kuni yanvar oyi maoshini tarqatishni boshladi. Bu haqda “Daryo”ga kompaniya ishchilari ma’lum qildi.
Bildirilishicha, ayni paytda kompaniyaning Toshkent viloyati Olmaliq shahri va Surxondaryo viloyatining Boysun tumanidagi zavodi ishchilariga maosh berilmoqda.
Navbat judayam ko‘p. Ko‘pchilik ertaga bayram bo‘lgani uchun pul olamiz deb, uzoq masofalardan ham kelgan. Faqatgina yanvar oyi maoshimizning 70 foizini naqd shaklida berishyapti. Qolgan 30 foizini plastik kartochkamizga tashlashar ekan, — deydi maosh olayotganidan quvongan ishchi.
Kecha, Enter Engineering ishchilari maosh berilmagani sabab ish tashlagani, 2023-yil oxiridan buyon maosh ololmayotgan ishchilar shu tarzda noroziligini namoyish qilayotgani xabar berilgandi. Ko‘p o‘tmay bunga munosabat bildirgan kompaniya mas’ullari ishchilariga 2024-yilning fevral oyi uchun ham maosh to‘langanini, endilikda mart oyi uchun ish haqini to‘lab berish jarayonlari davom etayotganini ma’lum qildi.
Kompaniyaning bu ma’lumoti bilan tanishgan ishchilar mas’ullar yolg‘on gapirib, vaziyatdan chiqishga urinayotganini aytdi.
Bu yolg‘on, shunchaki vaziyatdan chiqish uchun aytilayotgan ma’lumot. Bizda 2023-yilning noyabr oyi uchun ham maosh olmaganlar bor. 2024-yilning yanvar, fevral oyi haqida gapirmasak ham bo‘ladi, — degandi bu haqda tahririyatga gapirgan suhbatdosh.
Yana bir ishchi to‘polonlar sabab mas’ullar ko‘pchilikka tahdid qilib, ishdan bo‘shatish bilan qo‘rqitganini bildirdi.
Izoh (0)