“G‘arb Putinni mag‘lub etishga urinib, har tomonlama harbiylashmoqda” — Serbiya prezidenti

G‘arb davlatlari o‘z harbiy salohiyatini oshirmoqda va Rossiyani mag‘lub etish maqsadida total militarizatsiya siyosatini olib bormoqda. Bu haqda Serbiya prezidenti Aleksandr Vuchich maʼlum qildi, deb xabar berdi “TASS”.

“Hozir sodir bo‘layotgan ishlar hammasi g‘irt ahmoqlik. Ularning barchasi Putinni osonlikcha yenga olamiz deb o‘ylashgan. Endi esa bunga osonlikcha erisha olmasliklarini ko‘rib turishibdi. G‘arbning hozirgi tendensiyasi to‘liq harbiylashtirish va zaxiralarni besh baravar ko‘paytirishga qaratilgan”, — degan Serbiya rahbari Vuchich.

Xabarda aytilishicha, Serbiya rahbari so‘nggi haftada mamlakat qurolli kuchlari shayligini tekshirgan. Prezident harbiy texnikalarni ishlab chiqarishni ko‘paytirish muhimligini taʼkidlagan.

Avvalroq Aleksandr Vuchich hozirgi sharoitda G‘arb Ukrainaga o‘z askarlarini yuborishi ehtimoldan uzoq emasligi borasida fikrlarini bildirib o‘tgan edi. Prezident, shuningdek, Ukraina mojarosi avj olishi xavfi mavjudligi borasida ham aytib o‘tgan.