Сербия хавфсизлик ва ахборот агентлиги собиқ раҳбари Александр Вулин мамлакатнинг келажаги Россия билан муносабатларга тўла боғлиқ эканлигини маълум қилди. Бу ҳақда “ТАСС” нашри хабар қилди.
Александр Вулин Россияни Сербия интеграцияси ва суверенитетининг кафолатларидан бири дея тилга олган. Бунинг исботи сифатида эса Косово можаросида Москва Белградни қўллаб-қувватлаганини келтирган.
“Ўзини Косово деб атаган давлатнинг Европа Кенгашига аъзоликка интилишига билдирилган муносабат Сербияга муносабатдир. Европа Иттифоқининг аксарият аъзолари ва Брюссел маъмуриятининг барча расмийлари Косово деб аталмиш давлатни ёқлаб овоз беришмоқда. Бу Сербияга қарши овоз беришдир. Ўзининг барча муаммоларига қарамай, Россия бизни яна бир бор қўллаб-қувватлади. Агар Россия ҳали ҳам Европа Кенгаши аъзоси бўлганида, Косово деб аталадиган ҳудуд номи тилга олинмаган бўларди”, — деган Сербия расмийси.
Александр Вулин серб жамиятини Россия ҳақидаги “уйдирма”ларга ишонмасликка чақирган. Россия бўлмаса, Белград учун тенглик ва адолат бўлмаслигини билдирган.
“Россия бўлмаган жойда Сербия учун адолат йўқ. Серблар, буни тушунмайсизларми?” — деган Вулин.
Европа Кенгаши Парламент ассамблеяси сиёсий қўмитаси 27 март куни Парижда йиғилиб, ўзини Сербиядан мустақил деб эълон қилган Косованинг ташкилотга аъзо бўлиш ҳақидаги аризасини кўриб чиққан эди. Сербия ташқи ишлар вазири Ивица Дачич бу ҳолатга муносабат билдириб, тан олинмаган Косовони Европа Кенгашига аъзо бўлишга таклиф қилиш қарори “шармандали, жанжалли ва Европа Кенгашининг барча тамойилларини бузувчи” қарор эканлигини билдирган.
Изоҳ (0)