Rossiyalik marhum aktyor va sirk rejissyori Yuriy Nikulin obrazi “Manyunya: Moskvadagi sarguzashtlar” filmi uchun neyrotarmoq yordamida gavdalantiriladi. Bu haqda People Talk nashri xabar bermoqda.
Oilaviy komediyada Yuriy Nikulinning sun’iy obrazi bosh rollardan birini ijro etadi. Aka-uka rejissyorlar Gevond va Sarik Andreasyanning komediyasi uchun sun’iy obrazni yaratish jarayoni sakkiz oy davom etdi.
Gevond Andreasyanning so‘zlariga ko‘ra, mazkur loyiha sun’iy intellekt yordamida marhum aktyorning tashqi ko‘rinishi va ovozini qayta tiklash bo‘yicha Rossiyadagi birinchi muvaffaqiyatli urinishdir. Film ijodkorlari afsonaviy aktyorning oilasidan uning obrazidan foydalanish uchun rasmiy ruxsatnoma olgan. Shu bilan birga, Yuriy Vladimirovichning surati reklama posterlarida va film treylerida ishlatilmaydi.
Eslatib o‘tamiz, Yuriy Nikulin 1997-yil 21-avgustda 76 yoshida Moskvada vafot etgan. Uning o‘limiga yurak operatsiyasidan keyingi asoratlar sabab bo‘lgan. Afsonaviy aktyor “Brilliant qo‘l”, “Kavkaz asirasi”, “Shurikning yangi sarguzashtlari” va boshqa ko‘plab filmlardagi rollari bilan tomoshabinlar ko‘nglidan joy olgan. 1982-yildan to vafotiga qadar sirkda badiiy direktor bo‘lib ishlagan.
Izoh (0)