Saudiya Arabistonining QSS AI & Robots kompaniyasi Sara ismli o‘zining ilk ayol qiyofasidagi robot-gumanoidini namoyish qildi. “Pravila jizni” nashri ta’kidlashicha, u nafaqat Arabistondagi, balki butun Yaqin Sharqdagi birinchi ayol robot-gumanoiddir.
Sara tashqi ko‘rinishi 25 yoshli qizga o‘xshaydi. Uning bo‘yi 1,62 metr bo‘lib, milliy libos — abaya kiyib yuradi. Robot yaratuvchilarning so‘zlariga ko‘ra, gumanoidni imkon qadar nafis va iboli tasvirlashga harakat qilingan. Shuning uchun Sara siyosat yoki shaxsiy mavzularda gapirmaydi, bunday savollarga javob bermaydi va suhbat mavzusini o‘zgartirib, odobsiz mavzulardan qochishga urinadi.
Ar-Riyodddagi QSS AI & Robots bosh direktori Eli Metri:
“Biz Saudiya Arabistonidanmiz. Mamlakatimizda bunday mavzular ommaviy muhokama qilinmasligi kerak”, — deb ta’kidladi.
Gumanoid arab va ingliz tillarida so‘zlashadi, uning nutqi mahalliy dasturchilar tomonidan ishlab chiqilgan. Saudiya Arabistoni dasturchilari Sarani yaratishda mashhur neyrotarmoqlarga, jumladan, ChatGPT’ga ishonch bildirmagan.
Sara to‘liq ravishda Saudiya Arabistonida loyihalangan va yaratilgan bo‘lib, uning yordamida mamlakat robototexnika va sun’iy intellekt sohasidagi muvaffaqiyatlariga jahon e’tiborini qaratmoqchi.
Avvalroq QSS AI & Robots Muhammad ismli yana bir robot-gumanoidni taqdim etgan edi. Ko‘rgazmada robot qo‘li bilan muxbir ayolning yelkasiga tegib ketgani uchun turli munozaralarga sabab bo‘lgan edi.
Izoh (0)