Украина президенти Владимир Зеленский кредит эвазига АҚШдан қурол олишга тайёр эканликларини айтди. Бу ҳақда у “Биз — Украина” телеканалига берган интервьюсида маълум қилди.
Зеленский Американинг ҳарбий ёрдамини “ўта муҳим” деб атади ва Украина “мамлакатдаги вазиятнинг гаровига” айланганини билдирди.
“Афсуски, Россиянинг Украинага қарши уруши АҚШда ички сиёсий масалага айланди, гарчи бу бутун дунё хавфсизлигига алоқадор”, — деди сиёсатчи.
У агар АҚШ Киевга ҳарбий ёрдамни “бугун кредитга” ёки “бир йилдан кейин текинга” таклиф қилса, биринчи вариантни танлашини таъкидлади:
“Бу ерда танлов йўқ, қанчалик тезроқ бўлса, шунча яхши”, — деди Зеленский.
Шунингдек, Украина президенти “мамлакат ҳаво ҳудудини бутунлай ёпиш учун” 25 та Patriot ҳаво ҳужумидан мудофаа тизими етишмаслигини айтди.
“Айнан Patriot Россиянинг сўнгги ҳафталардаги оммавий ҳужумларида Украинанинг энергия тизимини ҳимоя қилишга ёрдам беради”, — дейди у.
Франция ҳарбийлари қандай ҳолатда Украинага келиши мумкин?
Бундан ташқари Зеленский интервьюда француз ҳамкасби Эммануэл Макроннинг Украинага қўшин юбориш ташаббусини қўллаб-қувватлади.
Унинг сўзларига кўра, хорижий ҳарбийлар айниқса икки йўналишда фойда келтириши мумкин: Украина армиясини тайёрлаш ва ишдан чиққан Ғарб ҳарбий техникасини таъмирлашда. Шу билан бирга, Зеленский хорижий армияларни очиқчасига урушда иштирок этишга чақиришга тайёр эмаслигини, чунки бу ҳолда Россия имкониятдан фойдаланиши ва “бошқа давлатларнинг ҳарбий ёрдамини тўхтатиши учун ҳамма нарсани қилишини” таъкидлади.
Макроннинг Украинага қўшин юбориш ташаббуси
26 февраль куни Макрон Европа давлатлари раҳбарлари билан учрашувдан сўнг Украинага қўшин киритилиши эҳтимолини рад этмади. У бу Киевни қўллаб-қувватлаш вариантларидан бири эканини таъкидлаган. Макроннинг ташаббуси Буюк Британия, Венгрия, Италия, Словакия, Чехия ва Швеция томонидан қўллаб-қувватланмаган.
Кремль бу ҳолатда “биз Россия ва НАТО ўртасидаги тўғридан тўғри тўқнашув эҳтимоли ҳақида эмас, балки муқаррарлиги ҳақида гапиришимиз керак” дея муносабат билдирди. НАТО бош котиби Йенс Столтенберг альянс Украинага ўз қўшинларини юборишни режалаштирмаётганини айтди.
Изоҳ (0)