Rossiyaning Qozog‘iston bilan chegaradosh Orenburg viloyatida to‘g‘on yorilishi oqibatida yuzaga kelgan suv toshqini tufayli 4 mingdan ortiq fuqaro favqulodda evakuatsiya qilindi. Bu haqda Al Jazeera nashri rus manbalariga tayanib, xabar bermoqda.
Rasmiylar Ural daryosidagi xavfli suv sathidan aholini ogohlantirgan. To‘g‘on buzilishi bo‘yicha tergov ishlarini boshlangan.
Orenburg gubernatorligining maʼlum qilishicha, hozirga qadar 4208 kishi, jumladan 1019 nafar bola xavfli zonadan evakuatsiya qilingan. Suv toshqinlari oqibatida 2500 dan ortiq uy zarar ko‘rgan.
Viloyat gubernatori Denis Pasler suv toshqini o‘zining “cho‘qqisiga” yetganini aytgan. 230 ming aholi yashaydigan chegara shahar Orskda vaziyat og‘ir ekanini maʼlum qilgan.
Favqulodda vaziyatlar vazirligi tomonidan eʼlon qilingan videotasvirlarda aholiga qutqaruv jiletlari kiydirilib, qutqaruv qayiqlariga tushishga yordam berilgani aks etgan. Minglab uylar suv ostida qolgan, deb xabar bermoqda Rossiya axborot agentliklari.
Rossiya hukumati, shuningdek, 2014-yilda qurilgan to‘g‘on yorilishi yuzasidan “beparvolik va qurilish xavfsizligi qoidalarini buzish” bo‘yicha jinoiy ish qo‘zg‘atgan. Mahalliy prokuratura to‘g‘on texnik xizmat ko‘rsatilmagani uchun buzilganini maʼlum qilgan.
Qozog‘iston prezidenti Qosim-Jo‘mart To‘qayev ham chegara yaqinidagi vaziyat haqida munosabat bildirgan. U suv toshqini so‘nggi 80-yil davomidagi ko‘lami va taʼsiri jihatidan Qozog‘istonda ham eng yirik tabiiy ofat bo‘lishi mumkinligini maʼlum qilgan.
Maʼlumot o‘rnida, 5-aprel kuni Rossiyaning Orenburg viloyati hududidan oqib o‘tuvchi Ural daryosida qurilgan to‘g‘onda yorilish sodir bo‘lgan edi. Mutaxassislar bu hodisaga ko‘p yog‘ingarchilik oqibatida daryo suvlari ko‘payishi va to‘g‘onga bosim ortishi sabab bo‘lganini maʼlum qilgan.
Izoh (0)