Rossiyaning Belgorod viloyatida 11 ta aholi punkti dronlar hujumi tufayli elektrsiz qoldi

Rossiyaning Belgorod viloyatidagi 11 ta aholi punkti elektr taʼminotidan uzilib qoldi. Bu haqda “TASS” nashri xabar qildi.

Manbaga ko‘ra, dastlab viloyatning Zadorojniy qishlog‘iga Ukraina harbiy dronidan portlovchi moslama tushirilgan. Hududda elektr uzatuv stansiyasi vayron bo‘lishi ortidan esa yaqin atrofdagi 11 ta aholi punkti elektr taʼminotisiz qolgan.

Belgorod gubernatori Vyacheslav Gladkov qayd etishicha, tez orada favqulodda vaziyatlar brigadalari hujum oqibatlarini bartaraf etishga kirishadi. Qo‘shni viloyatlardan ham yordam kuchlari chaqirilgan.

“Krasnoyarujskiy tumanidagi Zadorojniy qishlog‘i chekkasiga Ukraina qurolli kuchlari dronlar yordamida hujum qildi. Qurbonlar yo‘q, ammo elektr uzatish liniyasi shikastlangan, 11 aholi punkti elektr taʼminotisiz qolgan”, — deyiladi viloyat rasmiylari bergan xabarda.