AQSH Vakillar palatasining sobiq spikeri Nensi Pelosi Vashingtonni Isroilga qurol savdosini to‘xtatishga chaqirdi. Bu haqda CNN nashri xabar berdi.
Manbaga ko‘ra, Nensi Pelosi demokratlarning Isroilga AQSH qurol-yarog‘ savdosini to‘xtatish haqidagi chaqiriqlariga qo‘shilganini bildirgan. So‘nggi kunlarda G‘azoda gumanitar yordam xodimlariga nisbatan hujumlar va gumanitar vaziyat keskinlashib borayotgani taʼkidlangan.
Prezident Jo Bayden va davlat kotibi Entoni Blinkenga yo‘llagan maktubida Pelosi va boshqa o‘nlab demokratlar Isroilning yetti nafar gumanitar xodim o‘limiga sabab bo‘lgan so‘nggi havo hujumini qoralab, bu holatdan qattiq g‘azabda ekanliklarini bildirishgan. AQSHni tomonlarni kelishtirishda iroda ko‘rsatishga chaqirishgan.
“Ushbu voqeani hisobga olib, biz sizni Isroilga yangi qurol paketini topshirishga ruxsat berish haqidagi yaqinda eʼlon qilingan qaroringizni qayta ko‘rib chiqishingizni va havo hujumi bo‘yicha to‘liq tergov tugaguniga qadar ushbu va har qanday hujum qurollarini yetkazib berishni to‘xtatib turishingizni qatʼiy talab qilamiz”, — deyiladi demokratlar AQSH rahbariyatiga yo‘llagan talabnomada.
Maktubda Bayden maʼmuriyatining so‘nggi paytlarda G‘azoga gumanitar yordam yetkazilishini oshirishga qaratilgan saʼy-harakatlari eʼtirof etilgan. Biroq ular tinch aholi ehtiyojlarini qondirish uchun yetarli emasligi haqida ogohlantirilgan.
Izoh (0)