Kiyevning hujumlari faollashuvi ortidan Rossiyaning Ukraina bilan chegaradosh Belgorod viloyatidan 5 ming nafar bola favqulodda evakuatsiya qilindi. Bu haqda The Moscow Times nashri xabar berdi.
Xabarda aytilishicha, o‘tgan haftada sodir etilgan transchegaraviy otishmalar va o‘ndan ortiq tinch aholi vakillari halok bo‘lishi mahalliy hukumatni evakuatsiya rejasi ishlab chiqishga majbur etgan. Ushbu reja asosida jami 9 ming nafar voyaga yetmaganlar boshqa hududlarga ko‘chirilishi xabar qilingan.
“Besh ming nafarga yaqin bolalar allaqachon viloyatdan tashqarida. Kecha ulardan 1300 nafari Sankt-Peterburg, Bryansk va Maxachqalʼaga yetib bordi”, — deyiladi Belgorod gubernatori Vyacheslav Gladkov xabarida.
Viloyatda qolgan va chegaraga yaqin munitsipalitetlarda, jumladan, mintaqaning poytaxti Belgorodda yashovchi bolalar masofaviy taʼlimga o‘tkazilishi, maktablar bo‘shatilishi maʼlum qilingan.
29-mart kuni Ukraina uchuvchisiz samolyoti Belgorod shahrida ko‘p qavatli uyga qulab tushgan edi. Oqibatda bir kishi halok bo‘lib, yana ikki nafar fuqaro tan jarohati olgan. Halokat va otishmalar doimiy sodir bo‘layotgani tufayli faol evakuatsiya davom ettirilmoqda.
Izoh (0)