Farg‘ona viloyati IIB Yo‘l harakati xavfsizligi boshqarmasi ijtimoiy tarmoqlarda tarqalgan YPX xodimlari haydovchiga kuch ishlatgani tasvirlangan video yuzasidan ma’lumot berdi.
Qayd etilishicha, mazkur holat 30-mart kuni Farg‘ona shahar “Al-Farg‘oniy” ko‘chasida sodir bo‘lgan. Nexia-3 transport vositasi haydovchisi avtobus bekatida to‘xtab, yo‘l harakati qoidalarini buzgan. YPX inspektori tomonidan qoidabuzarlik yuzasidan maʼmuriy bayonnoma rasmiylashtirish vaqtida haydovchi inspektorning qonuniy talabiga bo‘ysunmasdan, tegishli hujjatlarni taqdim qilmagan va transport vositasini vaqtinchalik jarima maydoniga olib ketilishiga qarshilik qilgan.
Shundan so‘ng haydovchi YPX inspektorlari tomonidan Farg‘ona shahar IIBga olib borilgan va qoidabuzarligi yuzasidan maʼmuriy bayonnoma rasmiylashtirilgan.
Hozirda ushbu holat yuzasidan qo‘shimcha o‘rganish ishlari olib borilmoqda, — deyiladi xabarda.
Eslatib o‘tamiz, 2023-yil mart boshlarida Qashqadaryo viloyati Shahrisabz shahrida ichki ishlar organi xodimining ovqatlanib o‘tirgan joyiga bostirib kirib, tasvirga olgan va ijtimoiy tarmoqlarga tarqatganlarga chora ko‘rilgandi. Shuningdek, aprel oyida Toshkentda ichki ishlar xodimini o‘ldirib, yoqib yuborgan 3 erkakka hukm o‘qilgani to‘g‘risida xabar berilgan edi.
Izoh (0)