Toshkent aeroporti hududida mavjud terminalni kengaytirish maqsadida qurilish ishlari olib borilayotgani sabab joylarda xavfsizlikni taʼminlash va odamlarning to‘planib qolishiga yo‘l qo‘ymaslik uchun terminal hududida bir qator cheklovlar joriy etildi. Bu haqda Uzbekistan Airports xabar berdi.
Qayd etilishicha, avtotransport vositalari, jumladan, taksilar va sayyohlik avtobuslari kirishi uchun xalqaro terminal avtoturargohi yonida yo‘lovchilarni tushirish/olish uchun alohida yo‘lak ajratilgan. Ushbu yo‘lakda yo‘lovchilarni tushirish 10 daqiqadan oshmasligi lozim. Uzoqroq vaqt to‘xtash lozim bo‘lsa, avtoturargohdan foydalanish kerak.
Shuningdek, rekonstruksiya ishlari munosabati bilan kuzatuvchilarning Toshkent xalqaro aeroporti jo‘nab ketish zaliga kirishi vaqtincha cheklangan. Istisno tariqasida, homilador va bolali ayollar, qariyalar va nogironlar hamrohligidagi shaxslarga terminal ichiga kirishga ruxsat etiladi. Ushbu shaxslar o‘zlari bilan shaxsni tasdiqlovchi hujjatga ega bo‘lishlari lozim.
Asosiy uchib ketish terminali oldidagi birinchi qavat qurilishini o‘z ichiga olgan bosqich 2024-yil iyun oyida yakunlanishi rejalashtirilgan. Uzbekistan Airports kompaniyasi rahbariyati va Toshkent aeroporti maʼmuriyati vaqtinchalik noqulayliklar uchun yo‘lovchilar, kuzatuvchi va kutib oluvchilardan uzr so‘raydi, — deyiladi xabarda.
Toshkent xalqaro aeroportida keng ko‘lamli qurilish va rekonstruksiya ishlari 2023-yil dekabrda boshlangan edi. Ayni paytda Toshkent xalqaro aeroporti terminalining o‘tkazish qobiliyati yiliga 7 million yo‘lovchini tashkil etadi. Poytaxt aeroportida 6,8 million yo‘lovchiga xizmat ko‘rsatish rejalashtirilgan. Xalqaro terminalni kengaytirish loyihasi 2 bosqichda amalga oshiriladi va 2025-yilning oxiriga qadar davom etadi. Mazkur ishlar yakuniga yetgach, o‘tkazish imkoniyati yiliga 13 million yo‘lovchiga yetkaziladi.
Izoh (0)