Nyu York politsiyasi suratga olishdan oldin hijoblarini yechishga majburlab, ularning huquqlarini poymol qilganini aytgan ikki musulmon ayolning da’vosini hal qilish uchun 17,5 million dollar to‘lashga rozi bo‘ldi. Bu haqda The Guardian xabar berdi.
Dastlabki kelishuv bitimi suratga tushishdan avval diniy bosh kiyimini yechishi kerak bo‘lgan shaxslarni qamrab oladi. Da’vo 5-aprel kuni Manhetten federal sudiga topshirilgan va AQSH okrug sudyasi Analisa Torresning roziligini talab qiladi. Umumiy to‘lov yuridik to‘lovlar va xarajatlar chegirib tashlanganidan keyin taxminan 13,1 million dollarni tashkil qiladi. Har bir da’vogarga 7 824 dan 13 125 dollargacha kompensatsiya to‘lanadi.
Kelishuv 2018-yilda ikki nafar ayol tomonidan mazkur masala bo‘yicha qo‘zg‘atilgan da’voni hal qiladi. O‘tgan yili Manhetten va Bruklinda politsiya ularni suratga olish uchun hijoblarini yechishga majburlagani aytilgan.
Da’voga javoban, Nyu York politsiya boshqarmasi 2020-yilda erkaklar va ayollar suratga tushganda yuzlari ko‘rinish sharti bilan diniy bosh kiyim kiyishga ruxsat bergan.
Ushbu kelishuv NY politsiya boshqarmasining ijobiy islohotiga olib keldi. Kelishuv boshqarmaning qat’iy diniy e’tiqodlarga bo‘lgan hurmatini va huquqni muhofaza qilish organlarining hibsga olish paytida suratga olish zaruriyatini diqqat bilan muvozanatlashtiradi, — dedi shahar huquq bo‘limi vakili Nikolas Paoluchchi.
Yangi siyosat boshqa diniy bosh kiyimlarga, shu jumladan, yahudiylar kiygan parik va yarmulkelarga, sikxlar kiygan sallalarga ham tatbiq etildi.
2014-yilning 16-martidan 2021-yilning 23-avgustiga qadar diniy bosh kiyimini yechishga majbur bo‘lgan shaxslar kompensatsiya olish huquqiga ega.
Izoh (0)