АҚШ келаси ҳафта консуллик ҳужуми бўйича Эрондан жавоб кутмоқда — CNN

АҚШ келаси ҳафта Суриядаги консулликка уюштирилган ҳужумга Эроннинг эҳтимолий жавобини кутмоқда. Бу ҳақда АҚШ президенти Жо Байден маъмуриятидаги манбаларига таяниб, CNN хабар берди.

Эҳтимолий ҳужум Байден ва Исроил бош вазири Биньямин Нетаньяху ўртасидаги асосий муҳокама мавзусига айланган эди.

Эроннинг Исроил ҳудудига тўғридан тўғри ҳужум қилиши АҚШ тайёрлаётган энг ёмон сценарийлардан биридир. Бундай зарба кенг кўламли минтақавий урушга олиб келиши мумкин, — деб таъкидлайди CNN.

Аввалроқ Оқ уй Миллий хавфсизлик кенгашининг стратегик алоқалар бўйича координатори Жон Кирби Вашингтон Эрон ва Исроил ўртасида кенг кўламли уруш бошланиши эҳтимолидан хавотирда эканини айтганди.

Исроилнинг i24News телеканали мамлакат Эроннинг Суриядаги консуллигига ҳаво ҳужуми уюштирганидан кейин Эрондан эҳтимолий ҳужумларга тайёрланаётгани ҳақида хабар берган.

4 апрель куни Эрон раҳбари Оятуллоҳ Али Хоманаий ўзининг Х саҳифасида иброний тилида пост ёзиб, Исроилни консуллик бўлимига ҳаво ҳужуми уюштиргани учун тавба қилишга мажбурлашини маълум қилган.

Эроннинг Дамашқдаги элчихонасида 13 киши, жумладан, Ислом инқилоби қўриқчилари корпусининг икки генерали ҳалок бўлган. Шунингдек, етти нафар ҳарбий маслаҳатчи — генераллар Муҳаммад Ризо Зоҳидий ва Муҳаммад Ҳоди Ҳожи Раҳимий ҳамда беш офицернинг ўлими ҳақида хабар қилинган эди.