Somali hukumati Efiopiya elchisini mamlakatdan chiqarib yuborganini eʼlon qildi. Bu haqda Al Jazeera nashri xabar berdi.
Xabarda aytilishicha, Mogadishudagi hukumat Efiopiya bilan Somaliland porti kelishuvi yuzasidan keskinlik kuchayishi ortidan Efiopiyaning Hargeisa va Garovedagi konsulliklarini ham yopgan. Port bo‘yicha kelishuvlar muzlatilgani xabar qilingan.
Somali bosh vaziri maʼmuriyati 5-aprel kuni Efiopiya elchisi Muxtor Muhammadning uyiga jo‘natilganini tasdiqlagan. Nizoning yuzaga kelishiga sabab sifatida esa Efiopiya rahbariyatining Somali ichki ishlariga aralashuvi keltirilgan.
“Efiopiya hukumatining Somalining ichki ishlariga ochiq aralashuvi Somalining mustaqilligi va suverenitetini buzishdir”, — deyiladi Somali bosh vaziri idorasi bayonotida.
Manbada aytilishicha, Somali tashqi ishlar vaziri Ali Umar Efiopiya elchisiga mamlakatni tark etishi uchun 72 soat vaqt bergan. Bu esa katta diplomatik keskinlikni keltirib chiqargan.
Mojaro dengizga chiqa olmagan Efiopiya 1-yanvar kuni Somalilanddagi 20 km (12 milya) qirg‘oq chizig‘ini ijaraga olish bo‘yicha o‘zaro anglashuv memorandumiga kelishib olganidan keyin yuzaga kelgan. Kelishuvga ko‘ra, Adan ko‘rfazidagi Berbera porti atrofidagi qirg‘oq hududi Efiopiya tomonidan 50-yil davomida harbiy va tijorat maqsadlarida foydalanishga berilishi kerak edi.
Efiopiya ijaraga oladigan hududida harbiy-dengiz bazasi tashkil qilmoqchi ekanligini bildirgan. Buning evaziga Somalilandni tan olishni taklif qilgan. Bu holatni esa Somali rasmiylari Efiopiya tomonidan hududining bir qismini qo‘shib olishga urinish deya baholagan. Oqibatda diplomatik munosabatlar taranglashgan.
Izoh (0)