Somali Efiopiyaning Somalilendning ajralgan hududini tan olishini va u yerda port qurishni to‘xtatish uchun urushga kirishga tayyor. Bu haqda Somali prezidentining katta maslahatchisiga tayanib, The Guardian xabar berdi.
1-yanvar kuni imzolangan anglashuv memorandumi dengizga chiqish imkoni bo‘lmagan Efiopiyaga Somalilend qirg‘og‘ida harbiy-dengiz bazasini qurishga ruxsat beradi. Somali esa Somalilendni o‘z hududi deb da’vo qiladi va kelishuvni haqiqiy emas deb e’lon qilgan.
7-yanvar kuni mamlakat prezidenti Hasan Shayx Mohamud Somali poytaxti Mogadishoda kelishuvga qarshi mitinglar bo‘lib o‘tgan bir paytda Somalini “vatanni himoya qilishga tayyorlanishga” chaqirgan.
“Biz barcha diplomatik variantlarni foydalanmoqdamiz va Efiopiya o‘ziga keladi deb o‘ylayman, ammo Abiy urushni xohlasa, biz unga tayyormiz”, — deya Somali prezidenti maslahatchisi Efiopiya bosh vaziri Abiy Ahmadga ishora qilgan.
Efiopiya va Somali 1977—78-yillarda bahsli hudud uchun konfliktga duch kelgan va taranglik hali ham davom etmoqda. Efiopiya 2006-yilda Mogadishudan islomchilarni siqib chiqarish uchun Somaliga bostirib kirgan va bu “al-Shabob” harakati isyonini kuchaytirishga yordam bergan.
Izoh (0)