Сомали ҳукумати Эфиопия элчисини мамлакатдан чиқариб юборганини эълон қилди. Бу ҳақда Al Jazeera нашри хабар берди.
Хабарда айтилишича, Могадишудаги ҳукумат Эфиопия билан Сомалиланд порти келишуви юзасидан кескинлик кучайиши ортидан Эфиопиянинг Ҳаргеиса ва Гароведаги консулликларини ҳам ёпган. Порт бўйича келишувлар музлатилгани хабар қилинган.
Сомали бош вазири маъмурияти 5 апрель куни Эфиопия элчиси Мухтор Муҳаммаднинг уйига жўнатилганини тасдиқлаган. Низонинг юзага келишига сабаб сифатида эса Эфиопия раҳбариятининг Сомали ички ишларига аралашуви келтирилган.
“Эфиопия ҳукуматининг Сомалининг ички ишларига очиқ аралашуви Сомалининг мустақиллиги ва суверенитетини бузишдир”, — дейилади Сомали бош вазири идораси баёнотида.
Манбада айтилишича, Сомали ташқи ишлар вазири Али Умар Эфиопия элчисига мамлакатни тарк этиши учун 72 соат вақт берган. Бу эса катта дипломатик кескинликни келтириб чиқарган.
Можаро денгизга чиқа олмаган Эфиопия 1 январь куни Сомалиланддаги 20 км (12 миля) қирғоқ чизиғини ижарага олиш бўйича ўзаро англашув меморандумига келишиб олганидан кейин юзага келган. Келишувга кўра, Адан кўрфазидаги Бербера порти атрофидаги қирғоқ ҳудуди Эфиопия томонидан 50 йил давомида ҳарбий ва тижорат мақсадларида фойдаланишга берилиши керак эди.
Эфиопия ижарага оладиган ҳудудида ҳарбий-денгиз базаси ташкил қилмоқчи эканлигини билдирган. Бунинг эвазига Сомалиландни тан олишни таклиф қилган. Бу ҳолатни эса Сомали расмийлари Эфиопия томонидан ҳудудининг бир қисмини қўшиб олишга уриниш дея баҳолаган. Оқибатда дипломатик муносабатлар таранглашган.
Изоҳ (0)