Урганч шаҳрида ва Тошкент вилоятининг Янгийўл туманида қурилиш ва таъмирлашдаги талон-торожликлар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти ахборот хизмати хабар берди.
Маълум қилинишича, департаментнинг Урганч шаҳар бўлими томонидан ўтказилган терговга қадар текширувда Хоразм вилояти автомобиль йўллари бош бошқармаси масъул шахслари ва бошқалар Урганч шаҳридаги темирйўл устидан ўтувчи кўприкни реконструкция қилишда расмий ҳужжатларга амалда бажарилмаган қурилиш-таъмирлаш ишларини қўшиб ёзиш орқали жами 549,3 млн сўмни ўзлаштириш йўли билан талон-торож қилганликлари аниқланган.
Шу каби, департаментнинг Янгийўл туман бўлими томонидан ўтказилган терговга қадар текширувда Янгийўл туман Ободонлаштириш бошқармаси ва “Т.Ф.” МЧЖ масъул шахслари ўзаро тил бириктириб, Қирариқ кўчасидаги 592 метр йўл асфалт қилинган бўлса-да, 2023 йилнинг 26 октябрида ушбу кўчани асфалт қилиш бўйича “Шаффоф” платформасига қўйиб, танловда “Т.Ф.” МЧЖ ғолиб бўлгач МЧЖ раҳбари Ф.Т. билан келишиб, расмий ҳужжатларга сохта маълумотлар киритиш орқали жами 239,8 млн сўмни ўзлаштириш йўли билан талон-торож қилганликлари аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)