Rossiya prezidenti Vladimir Putinning universitetdagi kursdoshi Rossiya Oliy sudi raisligiga nomzod sifatida ko‘rsatildi. Bu haqda The Moscow Times nashri xabar berdi.
Xabarda aytilishicha, voqea haqida dastlab “Rapsi” huquqiy axborot agentligi 1-aprel kuni maʼlum qilgan.
Rossiya Oliy sudi raisining o‘rinbosari Irina Podnosova va Vladimir Putin Leningrad davlat universitetida huquq fakultetida tahsil olishgan. Ikkalasi ham 1975-yilda uni tamomlagan.
Manbaga ko‘ra, sudning malaka hayʼati bir ovozdan Podnosovani Rossiya federal sud tizimining eng yuqori lavozimli xodimi bo‘lgan bosh sudya lavozimiga tavsiya qilgan. Hozirda nomzod uchun jiddiy to‘siq yo‘q.
Podnosova Putin uning nomzodini yuqori palata Federatsiya kengashiga ovoz berish uchun taqdim etganidan so‘ng o‘z vazifasini bajarishga kirishishi kutilmoqda.
Oliy sudning bundan oldingi raisi Vyacheslav Lebedev 1991-yildan beri vazifasini bajarib kelayotgan edi. Fevral oyi oxirida u 80 yoshida vafot etgani xabar qilingan edi.
Oliy sudning iqtisodiy nizolar bo‘yicha sudlov hayʼatini boshqaradigan Podnosova 2020-yil iyul oyidan buyon sudya o‘rinbosari lavozimida ishlab kelayotgani aytiladi. Kreml uning nomzodini Rossiyada gender tengsizlik yo‘qligini ko‘rsatuvchi dalolat sifatida baholagan.
Maʼlumot o‘rnida, o‘tgan oyda Kiyev rasmiylari Podnosovani Rossiyaning Ukrainaga keng ko‘lamli hujumini qo‘llab-quvvatlaganlikda ayblab, sanksiyalar ro‘yxatiga qo‘shgan edi.
Izoh (0)