“Million” jamoasi sardori Davron Kabulov “Daryo” muxbiri Nargiza Murodovaga bergan intervyusida mehmonxona ishi bo‘yicha sudlashayotgani va baʼzi tashkilotlar tadbirkorlarni “qo‘llab-quvvatlash” uchun harakat qilayotgani haqida gapirdi.
— O‘tgan yili avgust oyida shaxsiy mehmonxonamiz ishga tushdi. Ikki yarim oy ishlagandan keyin Yakkasaroy gaz taʼminoti Prokuratura huzuridagi iqtisodiy jinoyatlarga qarshi kurashish departamenti bilan birga kelib, mehmonxonani nishonga olishdi. Ikki yillik davr uchun 387 million so‘m jarima qo‘llashdi. Undan keyin ham olti oyga yaqin vaqt o‘tdi, ammo hali mehmonxona buncha daromad topgani yo‘q. Menimcha, ular tadbirkorlarni shu tarzda “qo‘llab-quvvatlashyapti”.
— Dadam mehmonxonaga gaz taʼminoti ulangandan keyin AQSHga ketdilar. Ammo u paytda hali mehmonxona ishga tushmagan edi. Yaʼni AQSHga ketmasdan avval sertifikat olish, GOST standartidan o‘tkazish kabi ishlarni amalga oshirib, mehmonxona ishga tushgandan keyin tuman gaz taʼminoti bilan shartnoma tuzib, gazni ulash kerak bo‘lgan. Ammo u jarayonda dadam Toshkentga bo‘lmaganlar. Ungacha bo‘lgan davrda mehmonxona ishlamaganini hamma biladi. Gaz taʼminoti esa ularga ariza topshirgan vaqtimizdan to bugungi kungacha bo‘lgan davrda quvurdan qancha gaz o‘tishi mumkin bo‘lsa, o‘shancha mablag‘ni hisoblab berishdi. Bu xuddi qishda ham yozda ham kuniga 24 soat tinimsiz gazdan foydalanilgan, degandek gap. Eshitishim bo‘yicha, ularning shunday biznesi bor ekan. Yaʼni bir-ikki so‘mini olib, gazni chiqarib berishar ekan-da, keyin tadbirkorlardan pulini undirib olishar ekan. Hozir shu ish bo‘yicha sud jarayonlari ketyapti, — deydi Davron Kabulov.
Yangi konsert dasturida “Million”ning sobiq tarkibi bo‘yicha faqat Davron Kabulov ishtirok etadi. Yangi tarkib tomoshabinlar ishonchini qozona oladimi?
— Menga jamoada kimningdir o‘rni sezilishi haqida olti yildan beri savol berishadi. To‘rtta odam chiqib ketganida ham xuddi shu savol berilgandi. Ularning o‘rnini sezdirmaslik uchun yangi chehralarni Maʼruf, Sarvar va Mo‘min kabi yigitlarni jamoaga oldik. Ular ketsa, yana boshqasi olinadi. Bunaqa savol bilan xuddi kimdir “Million”ning sinishini kutib turganga o‘xshaydi, — deydi Davron Kabulov.
Davron Kabulov Mirkomil Musayev bilan sahnada xayrlashayotganida qattiq taʼsirlangani, bu kadrni videoda chiqarish haqida uzoq o‘ylagani haqida gapirdi.
— Montaj jarayonida ko‘zim yoshlangan sahnani qo‘yish haqida ko‘p o‘yladik. Chunki har kungi konsert tasvirlarida deyarli bir xil emotsiyada turibman. Menimcha, 7-8 marta bu kadrni olib tashlatib, qayta joylatdim.
Mirkomil aka bilan nafaqat sahnada, balki hayotda ham yaqin bo‘lganmiz. U inson bilan 17 yil birga ijod qildik. Birinchi konsertni O‘zMU madaniyat saroyida ham birga berganmiz. Faraz qiling, oldingizda 17 yildan beri bor odam keyingi konsertda ishtirok etmaydi. Aravani tortish menga va yoshlarga qolyapti. Mirkomil akaning ketishini oddiy, hech qanday hissiyotsiz qabul qilolmasdim.
Montajchi bilan necha marta ishlagan bo‘lsam, aynan shu sahnada yig‘lab yubordim, — deydi Davron Kabulov.
Davron Kabulov sobiq jamoa aʼzolari bilan konsertoldi maslahatlashadimi yoki ularga sahna ortida hamkorlik qilish taklifini berganmi?
— Alisher bu yo‘nalishga qaytmaslikka ahd qilgan. Mirkomil aka esa masʼuliyatli vazifani bajaradigan rahbar. O‘zi oxirgi yillarda asosiy ishidan ortib, ijodga vaqt ajratishga ham imkoni bo‘lmayotgan edi.
Kun kelib hammamiz jamoani tark etamiz. Chunki avlodlar almashib boraveradi. To‘g‘ri, Alisher va Mirkomil akaning ketishi jamoaga katta yo‘qotish bo‘lgandir, ammo ular qadri borligida, muxlislar olqishi bilan sahnani tark etishdi. Bu holat yoqimli, — deydi Davron Kabulov.
Videoni to‘liq holda quyida tomosha qilishingiz mumkin.
Izoh (0)