“Меҳмонхона иши бўйича судлашяпман” — Даврон Кабулов туман газ таъминотининг ишидан норозилиги ва “Миллион”нинг синишини кутаётганлар ҳақида гапирди (видео)

“Миллион” жамоаси сардори Даврон Кабулов “Дарё” мухбири Наргиза Муродовага берган интервьюсида меҳмонхона иши бўйича судлашаётгани ва баъзи ташкилотлар тадбиркорларни “қўллаб-қувватлаш” учун ҳаракат қилаётгани ҳақида гапирди.

— Ўтган йили август ойида шахсий меҳмонхонамиз ишга тушди. Икки ярим ой ишлагандан кейин Яккасарой газ таъминоти Прокуратура ҳузуридаги иқтисодий жиноятларга қарши курашиш департаменти билан бирга келиб, меҳмонхонани нишонга олишди. Икки йиллик давр учун 387 миллион сўм жарима қўллашди. Ундан кейин ҳам олти ойга яқин вақт ўтди, аммо ҳали меҳмонхона бунча даромад топгани йўқ. Менимча, улар тадбиркорларни шу тарзда “қўллаб-қувватлашяпти”.

— Дадам меҳмонхонага газ таъминоти улангандан кейин АҚШга кетдилар. Аммо у пайтда ҳали меҳмонхона ишга тушмаган эди. Яъни АҚШга кетмасдан аввал сертификат олиш, GOST стандартидан ўтказиш каби ишларни амалга ошириб, меҳмонхона ишга тушгандан кейин туман газ таъминоти билан шартнома тузиб, газни улаш керак бўлган. Аммо у жараёнда дадам Тошкентга бўлмаганлар. Унгача бўлган даврда меҳмонхона ишламаганини ҳамма билади. Газ таъминоти эса уларга ариза топширган вақтимиздан то бугунги кунгача бўлган даврда қувурдан қанча газ ўтиши мумкин бўлса, ўшанча маблағни ҳисоблаб беришди. Бу худди қишда ҳам ёзда ҳам кунига 24 соат тинимсиз газдан фойдаланилган, дегандек гап. Эшитишим бўйича, уларнинг шундай бизнеси бор экан. Яъни бир-икки сўмини олиб, газни чиқариб беришар экан-да, кейин тадбиркорлардан пулини ундириб олишар экан. Ҳозир шу иш бўйича суд жараёнлари кетяпти, — дейди Даврон Кабулов.

Янги концерт дастурида “Миллион”нинг собиқ таркиби бўйича фақат Даврон Кабулов иштирок этади. Янги таркиб томошабинлар ишончини қозона оладими?

— Менга жамоада кимнингдир ўрни сезилиши ҳақида олти йилдан бери савол беришади. Тўртта одам чиқиб кетганида ҳам худди шу савол берилганди. Уларнинг ўрнини сездирмаслик учун янги чеҳраларни Маъруф, Сарвар ва Мўмин каби йигитларни жамоага олдик. Улар кетса, яна бошқаси олинади. Бунақа савол билан худди кимдир “Миллион”нинг синишини кутиб турганга ўхшайди, — дейди Даврон Кабулов.

Даврон Кабулов Миркомил Мусаев билан саҳнада хайрлашаётганида қаттиқ таъсирлангани, бу кадрни видеода чиқариш ҳақида узоқ ўйлагани ҳақида гапирди.

— Монтаж жараёнида кўзим ёшланган саҳнани қўйиш ҳақида кўп ўйладик. Чунки ҳар кунги концерт тасвирларида деярли бир хил эмоцияда турибман. Менимча, 7-8 марта бу кадрни олиб ташлатиб, қайта жойлатдим.

Миркомил ака билан нафақат саҳнада, балки ҳаётда ҳам яқин бўлганмиз. У инсон билан 17 йил бирга ижод қилдик. Биринчи концертни ЎзМУ маданият саройида ҳам бирга берганмиз. Фараз қилинг, олдингизда 17 йилдан бери бор одам кейинги концертда иштирок этмайди. Аравани тортиш менга ва ёшларга қоляпти. Миркомил аканинг кетишини оддий, ҳеч қандай ҳиссиётсиз қабул қилолмасдим.

Монтажчи билан неча марта ишлаган бўлсам, айнан шу саҳнада йиғлаб юбордим, — дейди Даврон Кабулов.

Даврон Кабулов собиқ жамоа аъзолари билан концертолди маслаҳатлашадими ёки уларга саҳна ортида ҳамкорлик қилиш таклифини берганми?

— Алишер бу йўналишга қайтмасликка аҳд қилган. Миркомил ака эса масъулиятли вазифани бажарадиган раҳбар. Ўзи охирги йилларда асосий ишидан ортиб, ижодга вақт ажратишга ҳам имкони бўлмаётган эди.

Кун келиб ҳаммамиз жамоани тарк этамиз. Чунки авлодлар алмашиб бораверади. Тўғри, Алишер ва Миркомил аканинг кетиши жамоага катта йўқотиш бўлгандир, аммо улар қадри борлигида, мухлислар олқиши билан саҳнани тарк этишди. Бу ҳолат ёқимли, — дейди Даврон Кабулов.

Видеони тўлиқ ҳолда қуйида томоша қилишингиз мумкин.