O‘zbekistonda 1-apreldan avtomobillar importi tartibi kuchaytirilishi, muvofiqlik sertifikati boshqa shaxs nomiga berilgan bo‘lsa, bojxona rasmiylashtiruvidan o‘tkazish taqiqlanishi kutilmoqda. Bu haqda “Gazeta.uz” xabar berdi.
28-mart kuni “Kun.uz” nashri “Rastamojka” Telegram kanaliga tayanib, o‘zgartirishlar hukumat topshirig‘i bilan kiritilayotgani, lekin xabar rasman tasdiqlanmagani haqida xabar bergandi.
“Gazeta.uz” bergan xabarga ko‘ra, bunday topshiriq 25-martda berilgan. Hujjat bilan Texnik jihatdan tartibga solish agentligining 19-martdagi xatida keltirilgan takliflarga rozilik berilgan.
Agentlik transport vositalarini realizatsiya qilish bilan shug‘ullanuvchi tadbirkorlik subyektlari transport vositasi turini maʼqullash hujjatini rasmiylashtirish jarayonidan qochib, bir turdagi transport vositasining har birini boshqa jismoniy shaxslar nomiga o‘tkazgan holda (Bojxona kodeksining 96-moddasi) muomalaga chiqarib, ichki bozorda realizatsiya qilayotganini taʼkidlagan.
Tashkilot buni bartaraf etish, transport vositalarining importini “tartibga solish” uchun quyidagilarni taklif qilgan:
- turini maʼqullash hujjati yoki muvofiqlik sertifikatini qo‘llash va muvofiqlik belgisidan foydalanish huqukini arizachi (muvofiqlik sertifikatining egasi) boshqa yuridik yoki jismoniy shaxsga berishini man etish.
- 2024-yil 1-apreldan bojxona ombori bojxona rejimiga joylashtirilgan tovarni boshqa shaxsga o‘tkazish normasini avtotransport vositalariga nisbatan tatbiq etmaslik va bojxona ombori bojxona rejimiga joylashtirilgan avtotransport vositasini boshqa shaxsga o‘tkazishni taʼqiqlash;
- respublikaga import qilingan yangi avtotransport vositalarining reglament talablariga to‘la muvofiqligi baholanib, turi maʼqullangandan keyin muomalaga chiqarish (bunda, bir kalendar yili davomida o‘z ehtiyoji uchun olib kelingan bir birlikdagi avtotransport vositasi mustasno).
- respublikaga import qilingan yangi avtotransport vositalarini sotish faqat yuridik shaxslar — ishlab chiqaruvchi korxonalarning rasmiy dilerlari tomonidan amalga oshirish tizimini qayta tiklash.
Agentlik xatida yana yengil toifadagi avtotransport vositalarini chet eldan import qilish hamda ularning sifat va xavfsizlik ko‘rsatkichlarining muvofiqligini taʼminlash bo‘yicha quyidagi normativ-hukukiy xujjatlar ishlab chiqilgani aytiladi:
- yangi xorijiy avtomobillar O‘zbekistonda faqat yuridik shaxslar — ishlab chiqaruvchi korxonalarining rasmiy dilerlari tomonidan sotilishi tartibini tiklash bo‘yicha (bu qoida 2023-yil 1-yanvardan bekor qilingandi, shundan so‘ng jismoniy shaxslar import avtomobillarni mamlakatga olib kirish va sotish imkoniyatiga ega bo‘ldi, bunday avtomobillar esa, o‘z navbatida, rasmiy dilerlardagidan arzonroq bo‘lib chiqdi);
- muomalaga chiqariladigan avtomobillar xavfsizligi bo‘yicha umumiy texnik reglamentga o‘zgartirish kiritish bo‘yicha.
“Hujjatlar loyihalari belgilangan tartibda rgojest.gov.uz elektron tizimi orqali tegishli vazirlik va idoralar bilan kelishilgan va jamoatchilik muhokamasiga joylashtirishga tayyorlangan. Biroq loyihalarni tartibga solish taʼsirini baholashdagi muammo, uning sabablari va vujudga keladigan salbiy oqibatlar yetarlicha yoritilmagani hamda “regulation.gov.uz” elektron tizimi orqali jamoatchilik muhokamasiga qo‘yilishi aholi va tadbirkorlarning eʼtirozlariga sabab bo‘lishi mumkinligini inobatga olib 2024-yil 15-yanvarda Prezident administratsiyasi tomonidan va 2024-yil 9-yanvarda Vazirlar Mahkamasi tomonidan rad etilgani munosabati bilan Adliya vazirligiga kiritilmagan”, – deyiladi “Gazeta.uz” xabarida.
Izoh (0)