Мактабгача ва мактаб таълими вазирининг 2024 йил 20 мартдаги тегишли буйруғи билан умумий ўрта таълим муассасаларида якуний давлат аттестацияси ўтказиш тартиби тасдиқланди.
Унга кўра, 9-синф ўқувчиларининг якуний давлат аттестацияси:
- она тили ва адабиёт фанидан — ёзма;
- давлат тили фани (таълим тили ўзбек тили бўлмаган синфлар учун)дан — ёзма;
- математика фанидан — ёзма;
- Ўзбекистон тарихи фанидан — ёзма/оғзаки;
- жисмоний тарбия фанидан — амалий шаклда ўтказилади.
11-синф ўқувчиларининг якуний давлат аттестацияси:
- она тили ва адабиёт фанидан — ёзма (иншо);
- математика фанидан — ёзма;
- ўзбек тили фанидан (таълим ўзбек тилида олиб борилмайдиган умумий ўрта таълим муассасалари учун, таълим муассасаси танлови асосида) — ёзма ва оғзаки;
- чет тили фанидан — ёзма/оғзаки;
- Ўзбекистон тарихи фанидан — ёзма/оғзаки;
- (ўқувчининг танлови бўйича) кимё, физика, давлат ҳуқуқ асослари, география фанларидан — ёзма шаклда ўтказилади.
Битирув имтиҳонлари (жисмоний тарбия фанидан ташқари) 2024 йил 26 майдан 15 июнга қадар, хусусан, 9-синф битирувчилари учун:
- она тили ва адабиёт фанидан — 27 май куни;
- математика фанидан — 30 май куни.
11-синфлар учун:
- она тили ва адабиёт фанидан — 29 май;
- математика фанидан — 1 июнь куни бўлиб ўтади.
Жисмоний тарбия фани имтиҳонлари (9-синф ўқувчилари учун) 2024 йил 1—6 май кунлари малакали тиббиёт ходимлари назорати остида ўтказилади.
Умумтаълим фанини билиш даражаси тўғрисида давлат намунасидаги сертификат ҳамда чет тили фанлари бўйича камида B1 даражадаги миллий ёки унга тенглаштирилган мос даражадаги халқаро тан олинган сертификатга эга бўлган ўқувчилар имтиҳондан муайян фандан озод қилинади.
Маълумот учун, 11-синфда ҳар бир ўқувчининг ихтиёрий танловига кўра танлов (вариатив) фанларидан бири якуний давлат аттестацияси ўтказилишидан бир ой олдин ўқувчининг аризасига кўра танланади. 11-синфда ҳар бир ўқувчининг ихтиёрий танлови ва ота-оналарнинг фикрларига асосланиб танлов (вариатив) фанларидан бири якуний давлат аттестацияси ўтказилишидан бир ой олдин таълим муассасаси томонидан танланади.
Танлов фани мажбурий фанлардан ташқари таклиф этилган фанлар орасидан танланади.
Аввалроқ Ўзбекистонда айрим педагоглар касбий сертификатлаш синовларидан ўтказилиши тўғрисида хабар берилганди. Вазирлар Маҳкамасининг қарори билан давлат умумий ўрта таълим ташкилотлари педагог кадрларини касбий сертификатлаш бўйича давлат хизматларини кўрсатишнинг маъмурий регламенти тасдиқланган.
Изоҳ (0)