Xorazmda 5 ta mayning ferma fosh etildi

Xorazm viloyatida 5 ta mayning fermasi fosh etildi. Bu haqda viloyat IIB ma’lum qildi. 

Xabar berilishicha, joriy yilning o‘tgan davri mobaynida Xorazm viloyati IIB Tezkor-qidiruv xizmati xodimlari tomonidan olib borilgan tezkor tadbirlar natijasida noqonuniy faoliyat olib borayotgan 5 ta mayning fermasi fosh etildi.

Jumladan, Yangibozor tumani “Yangiyop” mahallasida yashovchi, 1980-yilda tug‘ilgan, J.T. o‘z uyida 2 dona Antminer S11 rusumli mayning qurilmasini elektr tarmog‘iga o‘zboshimchalik bilan ulab, noqonuniy tarzda foydalanib, tuman elektr tarmoqlari korxonasi manfaatlariga 320 000 000 so‘m miqdorida zarar yetkazgani ma’lum bo‘ldi.

Xonqa tumani “Mustaqillik” mahallasida yashovchi 1990- yilda tug‘ilgan, E.Q. esa uyining tom qismida o‘rnatilgan 1 dona ASIC Bitmain Antminer S11 rusumli mayning qurilmasini elektr tarmog‘iga noqonuniy ravishda ulab, foydalanib kelayotgani tezkor xodimlar tomonidan fosh etildi, u tuman elektr tarmoqlari korxonasi manfaatiga 7 878 570 so‘m miqdorda zarar yetkazgani ma’lum bo‘ldi.

Shuningdek, Yangibozor tumani Nurli bo‘ston ko‘chasida yashovchi 1979-yilda tug‘ilgan A.S. yashash uyining yordamchi xo‘jaligiga o‘rnatilgan 4 dona Antminer L 3 rusumli mayning qurilmasidan noqonuniy foydalanish orqali tuman elektr tarmoqlari korxonasi manfaatiga 193 000 000 so‘m miqdorida zarar yetkazgani aniqlandi.

Yangibozor tumani “Hamza” mahallasida yashovchi, 1979-yilda tug‘ilgan D.M.ning xonadoni tezkor xodimlar tomonidan xolislar ishtirokida ko‘zdan kechirilganida, u yashash uyining yordamchi xo‘jaligiga o‘rnatilgan 1 dona Antminer S11 mayning qurilmasidan noqonuniy foydalanib kelayotgani, buning natijasida esa tuman elektr tarmoqlari korxonasi manfaatiga 16 000 000 so‘m miqdorida zarar yetkazgani aniqlandi.

Yangibozor tumani “Achaqala” mahallasida yashovchi, 1976-yilda tug‘ilgan E.Q. nazorat qilinmaydigan daromad ko‘rish va noqonuniy yo‘llar bilan jinoiy boylik orttirish maqsadida, yashash uyining yordamchi xo‘jaligiga o‘rnatilgan 3 dona Antminer S11 rusumli mayning qurilmasini elektr tarmog‘iga noqonuniy ravishda ulab, foydalanib kelayotgani, buning natijasida tuman elektr tarmoqlari korxonasi manfaatiga 32 000 000 so‘m miqdorida zarar yetkazgani aniqlandi.

Yuqoridagi holatlar yuzasidan Jinoyat kodeksining tegishli moddasiga ko‘ra jinoyat ishi qo‘zg‘atilib, dastlabki tergov harakatlari olib borilmoqda.