Namangandagi bog‘chada tarbiyachilar bolaga ruhiy bosim o‘tkazib, uni haqorat qilgani aniqlandi

Namangandagi bog‘chada tarbiyachilar bolaga ruhiy bosim o‘tkazib, uni haqorat qilgani aniqlandi. Bolalar ombudsmani holat yuzasidan ma’lumot berdi.

Qayd etilishicha, bolalar ombudsmani kotibiyatiga ishonch telefoni orqali Namangan viloyatida yashovchi fuqarodan murojaat kelib tushdi. Uning 2019-yilda tug‘ilgan farzandi M.X. (o‘g‘il bola) Pop tumanidagi davlat maktabgacha ta’lim tashkilotiga qatnashini, 21-fevral kuni ushbu ta’lim tashkilotida pedagog xodimlar guruhdagi bolalarni qarovsiz qoldirgani, bu holatdan xabar topgan ota pedagog xodimlarga e’tiroz bildirganini ma’lum qilgan.

Shundan so‘ng tarbiyachilar bolaga ruhiy bosim o‘tkazib, uni haqorat qilgani uchun yuqoridagi xodimlarga nisbatan qonuniy chora ko‘rib, farzandining huquqlari himoya qilinishini so‘ragan. Bolalar ombudsmani so‘rovi asosida Maktabgacha va maktab ta’limi vazirligi huzuridagi Maktabgacha ta’lim agentligi ushbu holatni atroflicha o‘rgandi.

O‘rganish natijasida Pop tumani maktabgacha va maktab ta’limi bo‘limi xodimlari tarbiyachi va uning yordamchilari o‘z xizmat vazifalariga loqaydlik bilan munosabatda bo‘lgani sababli tashkilot direktorining buyrug‘iga ko‘ra ularga nisbatan Mehnat kodeksining 312-moddasi 1-bandiga asosan hayfsan intizomiy jazo chorasi qo‘llandi.