Хоразмда 5 та майнинг ферма фош этилди

Хоразм вилоятида 5 та майнинг фермаси фош этилди. Бу ҳақда вилоят ИИБ маълум қилди. 

Хабар берилишича, жорий йилнинг ўтган даври мобайнида Хоразм вилояти ИИБ Тезкор-қидирув хизмати ходимлари томонидан олиб борилган тезкор тадбирлар натижасида ноқонуний фаолият олиб бораётган 5 та майнинг фермаси фош этилди.

Жумладан, Янгибозор тумани “Янгиёп” маҳалласида яшовчи, 1980 йилда туғилган, Ж.Т. ўз уйида 2 дона Antminer S11 русумли майнинг қурилмасини электр тармоғига ўзбошимчалик билан улаб, ноқонуний тарзда фойдаланиб, туман электр тармоқлари корхонаси манфаатларига 320 000 000 сўм миқдорида зарар етказгани маълум бўлди.

Хонқа тумани “Мустақиллик” маҳалласида яшовчи 1990- йилда туғилган, Э.Қ. эса уйининг том қисмида ўрнатилган 1 дона АSIC Bitmain Antminer S11 русумли майнинг қурилмасини электр тармоғига ноқонуний равишда улаб, фойдаланиб келаётгани тезкор ходимлар томонидан фош этилди, у туман электр тармоқлари корхонаси манфаатига 7 878 570 сўм миқдорда зарар етказгани маълум бўлди.

Шунингдек, Янгибозор тумани Нурли бўстон кўчасида яшовчи 1979 йилда туғилган А.С. яшаш уйининг ёрдамчи хўжалигига ўрнатилган 4 дона Antminer L 3 русумли майнинг қурилмасидан ноқонуний фойдаланиш орқали туман электр тармоқлари корхонаси манфаатига 193 000 000 сўм миқдорида зарар етказгани аниқланди.

Янгибозор тумани “Ҳамза” маҳалласида яшовчи, 1979 йилда туғилган Д.М.нинг хонадони тезкор ходимлар томонидан холислар иштирокида кўздан кечирилганида, у яшаш уйининг ёрдамчи хўжалигига ўрнатилган 1 дона Antminer S11 майнинг қурилмасидан ноқонуний фойдаланиб келаётгани, бунинг натижасида эса туман электр тармоқлари корхонаси манфаатига 16 000 000 сўм миқдорида зарар етказгани аниқланди.

Янгибозор тумани “Ачақала” маҳалласида яшовчи, 1976 йилда туғилган Э.Қ. назорат қилинмайдиган даромад кўриш ва ноқонуний йўллар билан жиноий бойлик орттириш мақсадида, яшаш уйининг ёрдамчи хўжалигига ўрнатилган 3 дона Antminer S11 русумли майнинг қурилмасини электр тармоғига ноқонуний равишда улаб, фойдаланиб келаётгани, бунинг натижасида туман электр тармоқлари корхонаси манфаатига 32 000 000 сўм миқдорида зарар етказгани аниқланди.

Юқоридаги ҳолатлар юзасидан Жиноят кодексининг тегишли моддасига кўра жиноят иши қўзғатилиб, дастлабки тергов ҳаракатлари олиб борилмоқда.