Turkiya xavfsizlik kuchlari 29-mart kuni firibgarlik uchun Interpol tomonidan qidiruvda bo‘lgan ikki gumondorni qo‘lga olgan. Bu haqda Anadolu nashri xabar berdi.
Xabarda aytilishicha, gumonlanuvchilar repatriatsiya markaziga topshirilgan. Endilikda ular o‘z mamlakatlariga qaytariladi.
“Interpolning qizil darajadagi ogohlantirishi bilan qidiruvda bo‘lgan, noqonuniy tashkiliy faoliyat va kontrabanda uchun sudlov eʼlon qilingan Talgat Baisov hamda firibgarlik aybi bilan xalqaro qidiruvda bo‘lgan Maxat Rahishov Istanbulda o‘tkazilgan “Mahzen-23” operatsiyasi doirasida qo‘lga olindi”, — deyiladi rasmiy xabarda.
Xavfsizlik xizmati vakillari firibgarlik bilan bog‘liq jinoyatlarga qarshi jiddiy kurash olib borilishini maʼlum qilgan. Bu borada Interpol va mintaqaviy tashkilotlar bilan faol hamkorlik qilinishi aytilgan.
“Xalqimiz tinchligini buzayotgan xalqaro uyushgan jinoyatchilik guruhlari va giyohvand moddalar savdosi bilan shug‘ullanuvchi shaxslarni ,ularning jinoyat darajasi qanday ekanligidan qatʼiy nazar, erkin nafas olishiga yo‘l qo‘ymaymiz. Biz ularning har birini adolat qo‘liga topshiramiz”, — deyilgan rasmiy bayonotda.
Izoh (0)